ܣܘܩܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ(ܟܠܕܘ ܪܡܙܝ ܐܘܓܼܢܐ)، ܝܘܡ ܚܡܫܒܫܒܐ 31 ܬܫܪܝܢ ܩܕܡܝܐ 2024، ܒܒܢܝܢܝܐ ܕܡܕܒܪܢܘܬܐ ܒܪܘܣܬܩܐ ܕܥܢܟܒܐ، ܒܨܘܝܐ ܘܟܬܘܒܐ (ܥܒܘܕ ܙܝܬܘܢ) ܐܬܝܢܐ ܡܢ ܐܠܡܢܝܐ، ܒܚܒܪܘܬܐ ܕܟܬܘܒܐ (ܝܘܣܦ ܙܝܥ̄ܐ) ܐܬܝܢܐ ܡܢ ܐܪܫܟܝܬܐ ܪܘܣܝܬܐ ܡܘܣܟܘ، ܠܫܘܬܦܬܐ ܒܦܘܠܚܢ̈ܐ ܕܠܘܡܕܐ ܕ(ܐܫܘܪ ܝܘܣܦ ܚܪܒܘܛ) ܕܦܝܫܠܗ ܥܒܝܕܐ ܒܩܢܛܪܘܢ ܡܪܕܘܬܢܝܐ ܐܬܘܪܝܐ ܒܡܕܝܢ̄ܬܐ ܕܕܗܘܟ، ܒܦܘܪܣܐ ܕܕܟܪܐ ܕ(175) ܠܥܐܕܐ ܕܓܠܝܘܢܘܬܐ ܣܘܪܝܝܬܐ.
ܘܕܪܫܠܗܘܢ ܬܪܘܝܗܝ ܓܢ̄ܒܢ̈ܐ ܒܣܘܕܝܗܝ ܩܐܡ ܡܪܕܘܬܢܝܐ ܣܘܪܝܝܐ ܒܥܝܪܩ ܘܩܠܝܡܐ ܕܟܘܪܕܣܬܢ، ܘܐܢܢܩܝܘܬܐ ܕܥܘܕܪܢܐ ܡܫܘܬܦܐ ܒܝܢ ܫܘܬܐܣ̈ܐ ܕܥܡܢ ܒܐܬܪܐ ܘܓܠܘܬܐ، ܠܛܘܪܢܬܐ ܕܩܐܡ ܡܪܕܘܬܢܝܐ، ܘܫܘܪܪܠܗ (ܐܘܓܼܢܐ) ܕܬܪ̈ܥܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܦܬܝܚ̈ܐܝܠܗܘܢ ܠܥܘܕܪܢܐ ܥܡ ܟܠ ܦܪ̈ܨܘܦܐ ܘܫܘܬܐܣ̈ܐ، ܠܦܘܠܚܢܐ ܒܚܕܕܐ ܠܡܪܡܬܐ ܕܨܒܘܬܐ ܕܡܪܕܘܬܐ ܕܥܡܢ ܘܛܘܪܢܬܗܿ ܒܐܬܪܐ ܘܓܠܘܬܐ ܒܚܕܕܐ.
ܘܒܚܘܬܡܐ ܕܬܦܩܬܐ، ܡܘܩܪܒܠܗ (ܐܘܓܼܢܐ) ܠܬܪܝܢ ܐܪ̈ܚܐ ܣܥܘܪ̈ܐ، ܢܘܣܟܐ ܡܢ ܡܢܝܢܐ ܐ̄ܚܪܝܐ ܡܢ ܡܓܠܬܐ ܕ(ܒܢܐܦܠ)، ܗܝ ܕܢܦܩܐ ܐܩܡܐܝܬ ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ.
