ܣܘܩܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܘܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ ( ܒܪܢܐܪܕ ܝܘܣܦ)، ܒܒܢܝܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܥܢܟܒܐ، ܝܘܡ ܚܕܒܫܒܐ 7 ܐܝܠܘܠ 2025، ܡܢܝܢܐ ܡܢ ܒܨܘܝ̈ܐ ܦܢܠܢܕܝ̈ܐ ܝܨܘܦ̈ܐ ܒܝܪܬܘܬܐ ܣܘܪܝܝܬܐ ܘܡܫܝܚܝܬܐ ܡܕܢܚܝܬܐ، ܒܚܒܪܘܬܐ ܕܪܫܐ ܓܘܢܝܐ ܕܕܝܪܝܘܬܐ ܐܢܛܘܢܝܬܐ ܗܘܪܡܙܕܝܬܐ ܟܠܕܝܬܐ ܐܒܐ ܕ. (ܣܐܡܪ ܨܘܪܝܫܘ ܝܘܚܢܢ).
ܘܟܪܟܠܗܿ ܡܫܕܪܘܬܐ ܒܡܢܘ̈ܬܐ ܕܒܝܬ ܥܬܝܩ̈ܬܐ ܘܚܙܐܠܗܿ ܐܝܬܘ̈ܬܗ ܝܪ̈ܬܘܬܢܝܐ، ܘܡܘܒܝܢܗܘܢ ܗܕܡ̈ܐ ܕܡܫܕܪܘܬܐ ܕܡܝܪܘܬܝܗܝ ܒܝܪܬܘܬܐ ܡܪܕܘܬܢܝܬܐ ܕܥܡܢ ܗܝ ܟܕܥܪܐ ܠܬܫܥܝܬܐ ܕܐܬܪܐ ܕܒܝܬ ܢܗܪܝܢ، ܚܕܐ ܡܢ ܡܕܝܢܝ̈ܘܬܐ ܐ̄ܢܫܝ̈ܐ ܒܬܒܝܠ، ܘܫܘܪܪܠܗܘܢ ܥܠ ܐܢܢܩܝܘܬܐ ܕܢܛܪܬܐ ܕܗܕ ܝܪܬܘܬܐ ܘܐܢܢܩܝܘܬܐ ܕܫܢܝܬܗܿ ܠܝܘܒܠ̈ܐ ܐܬܝܢ̈ܐ ܠܢܛܪܬܗܿ ܡܢ ܬܠܩܬܐ.
ܘܕܪܫܠܗܘܢ ܬܪܘܝܗܝ ܓܢ̄ܒܢ̈ܐ ܒܬܦܩܬܐ ܩܐܡ ܡܪܕܘܬܢܝܐ ܕܥܡܢ ܒܥܝܪܩ ܘܩܠܝܡܐ ܕܟܘܪܕܣܬܢ، ܘܫܘܪܪܠܗ (ܐܘܓܼܢܐ) ܕܬܪ̈ܥܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܦܬܝܚ̈ܐܝܠܗܘܢ ܠܥܘܕܪܢܐ ܥܡ ܟܠ ܦܪ̈ܨܘܦܐ ܘܫܘܬܐܣ̈ܐ، ܠܦܘܠܚܢܐ ܒܢܝܫܐ ܕܡܪܡܬܐ ܕܨܒܘܬܐ ܕܡܪܕܘܬܐ ܕܥܡܢ ܘܛܘܪܢܬܗܿ ܒܐܬܪܐ.
