ܣܘܩܒܠܗ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ، ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܐܡܢܬܐ ܣܘܪܝܝܬܐ ܬܘܬܘܒܬܐ “ܣܘܥܐܕ ܐܠܝܐܣ” ، ܘܥܡ ܣܦܪܐ “ܦܛܪܘܣ ܢܒܬܝ” ܝܘܡܐ ܕܬܠܬܒܫܒܐ 11 ܟܢܘܢ ܬܪܝܢܐ 2023 ܒܒܢܝܢܐ ܕܡܕܒܪܢܘܬܐ ܓܘܢܝܬܐ.
ܘܚܩܪܗܿ ܐܡܢܬܐ ܣܥܘܪܬܐ ܒܟܫܝܪ̈ܘܬܐ ܘܥܒܘܕܘ̈ܬܐ ܐܢܝ ܕܒܩܝܡܐܝܠܗܿ ܓܘܝܗܝ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܓܘ ܦܢ̈ܝܬܐ ܡܫܚܠܦ̈ܐ ܕܐܝܬܘܬܐ ܕܥܡܢ ܘܗܝ ܟܫܝܪܘܬܐ ܐ̄ܚܪܝܬܐ ܫܒܘܥܐ ܡܪܕܘܬܢܝܐ ܣܘܪܝܝܐ 2022، ܗܘ ܕܦܝܫܠܗ ܥܒܝܕܐ ܠܡܬܚܐ ܡܢ 8-12 ܟܢܘܢ ܩܕܡܝܐ ܥܒܝܪܐ، ܘܡܫܢܝܐ ܒܝܢܬ ܬܪܬܝ ܡܕܝܢ̈ܬܐ ܕܢܘܗܕܪܐ ܘܙܟܼܘ ܒܗܘܦܪܟܝܐ ܕܕܗܘܟ ܘܐܠܩܘܫ ܘܬܠܣܩܘܦ ܒܕܫܬܐ ܕܢܝܢܘܐ.
ܘܡܢ ܓܢ̄ܒܗ ، ܡܚܘܬܬܠܗ “ܐܘܓܼܢܐ” ܥܠ ܐܢܢܩܝܘܬܐ ܕܓܪܐ ܕܐܡܢܐ ܓܘ ܫܢܝܬܐ ܕܐܓܪܬܐ ܕܥܡܗ ܒܐܪܘܚܐ ܕܐܡܢܐ ܗܘ ܕܡܩܪܒܠܗ، ܘܐܦ ܗܕܟ ܚܩܪܗ ܒܡܐܙܠܬܐ ܕܐܡܢܬܐ”ܣܘܥܐܕ ܐܠܝܐܣ” ܗܝ ܡܠܝܬܐ ܡܢ ܡܘܗܒܬܐ، ܘܡܚܘܬܬܠܗ ܥܠ ܛܘܝܒܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܠܣܢܕܬܐ ܕܟܠܝܗܝ ܐܡܢ̈ܐ ܕܥܡܢ ܘܥܘܕܪܢܐ ܥܡ ܟܠܝܗܝ ܫܘܬܐܣ̈ܐ ܡܪ̈ܕܘܬܢܝܐ ܠܬܫܡܫܬܐ ܕܡܪܕܘܬܐ ܣܘܪܝܝܬܐ.