ܡܘܩܝܡܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܥܘܕܪܢܐ ܥܡ ܚܘܝܕܐ ܕܣܦܪ̈ܐ ܘܣܝ̈ܘܡܐ ܣܘܪ̈ܝܝܐ، ܒܨܦܪܐ ܕܚܕܒܫܒܐ 1 ܬܫܪܝܢ ܬܪܝܢܐ 2026، ܙܘܝܚܐ ܒܦܘܪܣܐ ܕܕܘܟܪܢܐ ܕ177 ܠܢܦܩܬܐ ܕܣܦܪ ܙܒܢܐ ܣܘܪܝܝܐ ܩܕܡܝܐ ܒܫܡܐ ܕ”ܙܗܪܝܪ̈ܐ ܕܒܗܪܐ”، ܘܗܘ ܒܐܘܢܐ ܕܦܢܕܩܐ ܕܗܝܟܣܘܣ ܒܪܘܣܬܩܐ ܕܥܢܟܒܐ ܒܐܪܒܝܠ.
ܘܡܫܘܪܠܗ ܙܘܝܚܐ ܥܒܘܕܝ̈ܬܗ ܒܣܡܟܬܐ ܕܚܕ ܢܘܩܙܐ ܕܙܒܢܐ ܒܫܬܝܩܘܬܐ ܐܝܩܪܐ ܠܪܘܚܐ ܕܣܗܕ̈ܐ ܕܓܠܝܘܢܘܬܐ ܣܘܪܝܝܬܐ ܘܣܗܕ̈ܐ ܕܐܬܪܐ ܘܡܡܠܐ ܚܐܪܐ، ܘܒܬܪ ܕܝܢ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܡܝܩܪܐ ܦ݈ܐܢ ܫܘܩܝ ܓܠܝܢܐ، ܡܡܠܗ ܕܡܘܩܒܠܗ ܒܓܘܗ ܗܘܢܝ̈ܐ ܘܒܪ̈ܟܝܬܗ ܠܓܠܝܘܢܪ̈ܐ ܘܝܘܕܥܝ̈ܐ ܘܟܬܘܒ̈ܐ ܦܠܚ̈ܐ ܒܓܝܓܠܐ ܕܓܠܝܘܢܘܬܐ ܣܘܪܝܝܬܐ، ܘܐܦ ܕܟܪܗ ܠܐܢܢܩܝܘܬܐ ܕܓܠܝܘܢܘܬܐ ܒܢܛܪܬܐ ܕܝܪܬܘܬܐ ܘܡܪܕܘܬܐ ܕܥܡܢ، ܘܡܫܘܪܪܗ ܥܠ ܐܢܢܩܝܘܬܐ ܕܣܢܕܬܐ ܕܚܐܪܘܬܐ ܕܓܠܝܘܢܪ̈ܐ ܘܢܛܪܬܐ ܕܙܕܩܝ̈ܗܝ ܒܐܬܪܐ، ܘܒܬܪ ܗܕܟ ܡܘܩܪܒܠܗ ܪܫܐ ܕܚܘܝܕܐ ܕܣܦܪ̈ܐ ܘܣܝ̈ܘܡܐ ܣܘܪ̈ܝܝܐ، ܣܦܪܐ ܐܟܕ ܡܘܪܐܕ ܡܡܠܗ، ܕܒܓܘܗ ܡܬܘܢܠܗ ܥܠ ܐܝܟܢܝܘܬܐ ܕܫܬܐܣܬܐ ܕܓܠܝܘܢܘܬܐ ܣܘܪܝܝܬܐ ܘܩܝ̈ܡܐ ܒܘܫ ܐܢܢܩܝ̈ܐ ܕܥܒܪܗ ܒܓܘܗܘܢ ܒܡܐܙܠܬܗ ܒܥܕܢܐ ܕ177 ܫܢܐ ܕܥܒܪ̈ܗܘܢ.
ܘܒܬܪ ܕܝܢ ܡܘܩܪܒܠܗ ܕܘܩܐ ܕܓܠܝܘܢܪ̈ܐ ܕܟܘܪܕܣܬܢ ܡܝܩܪܐ ܐܙܐܕ ܚܡܕ ܐܡܝܢ، ܡܡܠܐ ܕܬܚܒܪܬܐ ܒܗܢ ܦܘܪܣܐ ܕܝܠܢܝܐ ܒܓܠܝܘܢܘܬܐ ܕܡܟܝ̈ܢܬܐ ܒܩܠܝܡܐ، ܒܬܪ ܗܕܟ ܡܘܩܪܒܠܗ ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܡܝܩܪܐ ܐܢܘ ܓܘܗܪ ܥܒܕܘܟܐ، ܡܡܠܗ ܕܡܫܘܪܪܗ ܒܓܘܗ ܥܠ ܕܘܪܐ ܕܫܘܠܛܢܘܬܐ ܕܩܠܝܡܐ ܒܣܢܕܬܐ ܕܠܫܢ̈ܐ ܐܘܡܬܢܝ̈ܐ ܘܡܪܕܘܬܐ ܕܡܟܝ̈ܢܬܐ ܚܗܝ̈ܐ ܒܩܠܝܡܐ.
ܒܬܪ ܕܝܢ ܦܝܫܠܗ ܓܠܝܚܐ ܦܝܠܡܐ ܟܪܝܐ ܥܠ ܓܠܝܘܢܘܬܐ ܣܘܪܝܝܬܐ ܠܡܦܩܢܐ ܐܝܐܕ ܓܒܐܪ، ܘܒܬܪ ܗܕܟ ܦܝܫܠܗ ܥܒܝܕܬܐ ܝܬܘܬܐ ܕܕܘܪܫܐ ܥܠ ܡܠܘܐܐ ܕ(ܓܠܝܘܢܘܬܐ ܣܘܪܝܝܬܐ ܘܝܘܒܠܐ ܚܕܬܐ) ܕܦܝܫܠܗ ܡܕܘܒܪܬܐ ܒܐܝܕܐ ܕܝܘܕܥܝܐ ܕܝܠܐܢ ܥܛܡܬ، ܘܡܫܘܬܦܠܗܘܢ ܒܓܘܗ ܬܪ̈ܝܢ ܝܘܕܥܝ̈ܐ (ܡܪܝܡ ܝܘܡܐܪܢ، ܐܢܕܝ ܣܘܠܩܐ).
ܘܒܬܪ ܗܕܟ ܡܘܩܪܒܠܗ ܝܗܠܐ ܕܐܡܢ̈ܐ ܣܘܪ̈ܝܝܐ ܠܘܚ̈ܐ ܐܡܢܝ̈ܐ ܡܢ ܦܠܟܠܘܪܐ ܝܪܬܘܬܢܝܐ ܕܥܡܢ، ܘܝܗܘܐ ܒܚܝܘܪܘܬܐ ܕܡܝܩܪܐ ܦܪܐܢܟ ܦܪܝܕ ܝܘܣܦ.
ܘܦܝܫܠܗܘܢ ܚܬܝܡܐ ܥܒܘܕܝ̈ܬܐ ܕܙܘܝܚܐ، ܒܡܝܩܪܬܐ ܕܓܘܒܝܐ ܡܢ ܓܠܝܘܢܪ̈ܐ ܘܝܘܕܥܝ̈ܐ ܦܠܚܢ̈ܐ ܒܓܠܝܘܢܘܬܐ ܣܘܪܝܝܬܐ ܘܦܠܥ̈ܐ ܝܘܕܥܝ̈ܐ ܡܫܚܠܦ̈ܐ ܐܝܩܪܐ ܠܫܘܡܠܝ̈ܗܝ ܝܘܕܥܝ̈ܐ، ܘܝܗܘܘ ܟܠ ܡܢ (ܡܐܠܠܐ ܦܪܓ، ܦܛܪܘܣ ܗܘܪܡܝܙܕ ܢܒܐܬܝ، ܪܘܢܕ ܦܘܠܘܣ، ܦܝܐܢ ܓܠܐܠ ܡܪܩܣ، ܦܐܬܪܝܣܝܐ ܐܒܪܗܝܡ، ܓܐܟ ܐܢܒܝܐ، ܨܒܪܝ ܐܝܣܚܩ، ܣܐܡܪ ܣܥܝܕ، ܕܘܝܕ ܝܘܚܢܢ، ܓܘܐܢ ܝܘܣܦ ܫܐܒܐ، ܡܢܐܠ ܐܒܘܢܐ، ܦܐܒܝܐܢ ܢܘܐܝܠ، ܣܬܝܦܢ ܚܒܝܒ، ܐܠܒܪܬ ܝܘܐܪܫ، ܪܐܓܒ ܐܠܝܐܣ، ܟܠܪܐ ܓܘܕܬ ܪܙܓܘ، ܐܡܝܪ ܬܐܘܡܐ ܒܘܝܐ، ܪܝܟܐܪܕ ܓܝܘܪܓ، ܥܒܕܝܫ ܐܝܫܝ، ܗܐܢܝ ܡܬܝ ܢܓܝܒ)، ܘܒܬܪ ܡܝܩܪܢܘܬܐ ܦܝܫܠܗ ܦܬܝܚܐ ܒܝܬ ܓܠܚܐ ܠܢܦܩܝ̈ܬܐ ܣܘܪ̈ܝܝܬܐ، ܒܗܢ ܙܘܝܚܐ، ܘܗܘ ܕܦܝܫܠܗ ܡܛܘܟܣܐ ܒܐܝܕܐ ܕܒܝܬ ܐܪ̈ܟܐ ܕܡܪܕܘܬܐ ܣܘܪܝܝܬܐ ܒܥܘܕܪܢܐ ܥܡ ܚܘܝܕܐ ܕܣܦܪ̈ܐ ܘܣܝ̈ܘܡܐ ܣܘܪ̈ܝܝܐ.
ܐܢܢܩܝܬܐ ܝܠܗ ܠܕܟܪܐ، ܕܥܡܢ ܓܡܙܝܚ ܒܥܐܕܐ ܕܓܠܝܘܢܘܬܐ ܣܘܪܝܝܬܐ، ܐܣܝܪܬܐ ܒܒܣܝܩܘܡܐ ܕܢܦܩܬܐ ܕܣܦܪ ܙܒܢܐ ܩܕܡܝܐ ܒܠܫܢܐ ܣܘܪܝܝܐ، ܒܫܡܐ ܕ(ܙܗܪܝܪ̈ܐ ܕܒܗܪܐ)، ܘܗܘ ܕܦܝܫܠܗ ܦܠܝܛܐ ܡܢܝܢܗ ܩܕܡܝܐ ܒܝܘܡܐ ܩܕܡܝܐ ܡܢ ܬܫܪܝܢ ܬܪܝܢܐ ܒܫܢܬܐ ܕ1849 ܒܡܕܝܢܬܐ ܕܐܘܪܡܝ ܒܐܝܪܐܢ.
