ܩܢܨܠܐ ܐܡܪܝܟܝܐ ܓܘܢܝܐ ܒܐܪܒܝܠ ܣܥܪ ܒܝܬ ܥܬܩ̈ܐ ܕܝܘܪܬܢܐ ܣܘܪܝܝܐ ܘܒܝܬ ܐܪ̈ܟܐ ܣܘܪܝܝܐ 

ܣܥܪܗ ܡܝܩܪܐ ( ܪܘܒܪܬ ܒܠܕܝܢܘ) ܩܢܨܠܐ ܐܡܪܝܟܝܐ ܓܘܢܝܐ ܒܐܪܒܝܠ، ܡܕܒܪܢܘܬܐ ܕܝܘܪܬܢܐ ܘܒܝܬ ܥܬܩ̈ܐ ܣܘܪܝܝܐ ܢܩܘܦܬܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܒܨܦܪܐ ܕܐܪܒܥܒܫܒܐ 22 / ܚܙܝܪܢ 2022 ، ܘܝܗ̄ܘܐ ܒܣܩܒܠܬܗ ܡܕܒܪܢܗܿ ܓܘܢܝܐ ܡܝܩܪܐ (ܟܠܕܘ ܪܡܙܝـ ܐܘܓܼܢܐ)، ܘܡܝܩܪܐ ( ܒܪܢܪܕ ܝܘܣܦ) ܡܕܒܪܢܐ ܕܝܘܪܬܢܐ ܘܒܝܬ ܥܬܩ̈ܐ ܣܘܪܝܝܐ ، ܘܡܝܩܪܬܐ (ܦܝܚܐܐ ܫܡܥܘܢ) ܡܫܬܐܠܢܝܬܐ ܕܒܝܬ ܐܪ̈ܟܐ ܣܘܪܝܝܐ ، ܘܡܝܩܪܬܐ (ܓ̰ܘܪܓ̰ܝܢܐ ܚܒܒܐ) ܡܫܬܐܠܢܝܬܐ ܕܝܘܕܥܐ ܘܐܣܘܪ̈ܐ ܒܡܕܒܪܢܘܬܐ ܓܘܢܝܬܐ ܘܡܢܝܢܐ ܡܢ ܫܕܬܢ̈ܐ .

ܘܒܬܪ ܩܒܠܬܐ ܒܫܝܢܐ ܒܐܪ̈ܚܐ ، ܡܘܩܪܒܠܗ ܡܝܩܪܐ ( ܐܘܓܼܢܐ) ܚܕ ܦܘܫܩܐ ܟܪܝܐ ܚܕܪ ܒܝܬ ܥܬܩ̈ܐ ܘܝܘܪܬܢܐ ܣܘܪܝܝܐ ܒܥܢܟܒܐ ܘܡܫܩܠ̈ܐ ܕܛܘܘܪܗ ܘܪܡܙܠܗ ܠܬܪܡܝܬܐ ( ܢܛܪܬܐ ܕܝܘܪܬܢܐ ܡܪܕܘܬܢܝܐ ܕܒܨܘܪ̈ܘܬܐ ܓܘ ܥܝܪܩ )، ܒܥܘܕܪܢܐ ܥܡ ܘܟܝܠܘܬܐ ܐܡܪܝܟܝܬܐ ܕܫܘܘܚܐ ܬܒܠܝܐ USAID ܘܐܘܝܘܬܐ ܕܥܬܩ̈ܐ، ܗܝ ܕܐܡܝܢܝܐܝܠܗ ܦܘܠܚܢܗܿ ܓܘ ܒܝܬ ܝܘܪܬܢܐ ܣܘܪܝܝܐ ܠܓܠܝܬܐ ܕܛܘܝܒܗ ܐܝܟ ܩܢܛܪܘܢ ܡܪܕܘܬܢܝܐ ܓܠܐ ܠܓܪܐ ܕܒܝܝـ̈ ܥܡܢ ܥܠ ܟܠܝܗ ܫܘܝ̈ܐ .

ܘܐܦ ܗܕܟ ܕܪܫܠܗܘܢ ܠܟܫܝܪ̈ܘܬܐ ܕܡܕܒܪܢܘܬܐ ܓܘܢܝܬܐ ܡܫܚܠܦ̈ܐ ܘܦܪ̈ܝܫܐ ܐܢܝـ ܕܟܡܛܟܣܐܠܗܘܢ ܓܘ ܡܬܚܐ ܐ̇ܚܪܝܐ ، ܐܝܟ ܥܕܥܐܕܐ ܕܝܘܪܬܢܐ ܣܘܪܝܝܐ ܘܒܝܬ ܓܠܚܐ ܆ܕܟܬܒܐ ܦܬܝܚܐ ܘܙܘܝܚܐ ܕܝܘܡܐ ܕܫܒܪܐ ، ܘܥܡ ܥܒܘܕܘܝ̈ܬܐ ܐ̇ܚܪ̈ܢܐ ܘܡܢ ܢܝܫ̈ܗܿ ܐܢܢܩܝ̈ܐ ܐܡܝܢܝܘܬܐ ܥܡ ܥܠܝܡ̈ܐ ܘܝܘܒܠܐ ܚܕܬܐ ܕܝܕܥܝ ܝܘܪܬܢܐ ܕܐܒܗܬܝ̈ܗܝـ ܘܝܕܥܝ ܓܪܝܗܝ ܓܘ ܒܢܝܢܐ ܡܕܝܢܝܐ ܘܡܪܕܘܬܢܝܐ. ܘܥܡ ܪܡܙܬܐ ܠܛܘܝܒܐ ܕܝܗܠܐ ܕܦܘܠܚܢܐ ܕܡܕܒܪܢܘܬܐ ܚܕ ܣܘܪܓܕܐ ܫܢ̄ܬܐܢܝܐ ܕܝܠܢܝܐ ܒܟܫܝܪ̈ܘܬܐ ܗܘ ܒܕ ܦܝܫ ܥܒܝܕܐ ܡܬܚܐ ܕܚܕ ܫܢ̄ܬܐ، ܘܡܢܝܗܝ ܬܢܝܬܐ ܕܢܘܦܩܐ ܕܡܓܠܬܐ ܕܒܢܐܦܠ ( ܘܪܩܐܝܬ ܘܐܠܟܬܪܘܢܐܝܬ)، ܗܝ ܟܠܝܬܐܝܠܗ ܡܢ ܚܕܟܡܐ ܫܢ̈ܐ ܥܒܝܪ̈ܐ .

ܒܬܪ ܗܕܟ ܟܪܟܠܗܿ ܐܝܙܓܕܘܬܐ ܣܥܘܪܬܐ ܒܣܗܡ̈ܐ ܕܒܝܬ ܥܬܩ̈ܐ ܘܫܡܥܠܘܢ ܠܦܘܫܩܐ ܡܠܝܢܐ ܚܕܪ ܡܢܕܝܢ̈ܐ ܝܘܪ̈ܬܢܝܐ ܘܥܡ ܡܐ ܕܐܝܬ ܓܘ ܐܘܢܝܗ ܡܪܕܘܬܢܝܐ ܡܢ ܨܘܪ̈ܬܐ ܘܫܪܒܐ ܕܚܝ̈ܐ ܕܒܟܪ̈ܐ ܕܩܝܡܬܐ ܡܪܕܘܬܢܝܬܐ ܘܪܢܝܝܬܐ ܘܐܡܢܝܬܐ ܘܐܘܡܬܢܝܬܐ ܕܒܢܝـ̈ ܥܡܢ ܘܚܕܪ ܙܘܝܬܐ ܕܝܠܢܝܬܐ ܕܣܥܘܪܘܬܐ ܬܫܥܝܬܢܝܬܐ ܕܩܕܝܫܘܬܗ ܕܦܦܐ ܦܪܢܣܝܣ ܠܥܝܪܩ .

ܘܐܦ ܗܕܟ ܣܥܪܗ ܡܝܩܪܐ (ܒܠܕܝܢܘ) ܠܒܝܬ ܐܪ̈ܟܐ ܕܡܪܕܘܬܐ ܣܘܪܝܝܬܐ ܘܚܙܐܠܗ ܡܐ ܕܚܒܫܐ ܡܢ ܫܡܢ̈ܐ ܓܠܝ̈ܐ ܕܡܒܘܥ̈ܐ ܐܢܢܩܝ̈ܐ ܫܩܠܝ ܝܨܝܦܘܬܐ ܡܢܝܗܝ ܒܨܘܝ̈ܐ ܘܝܨܘܦ̈ܐ ܒܚܩܠܐ ܣܘܪܝܝܐ ، ܘܦܪܝܫܐܝܬ ܟܬܒ̈ܐ ܥܬܝܩ̈ܐ ܘܣܘܪ̈ܛܐ، ܘܥܡ ܦܪ̈ܝܣܬܐ ܕܡܕܒܪܢܘܬܐ ܓܘ ܫܫܠܬܐ ܕܡܪܕܘܬܐ ܣܘܪܝܝܬܐ ܐܢܝ ܕܡܛܝ ( 40) ܦܪ̈ܝܣܬܐ، ܘܡܘܩܪܒܠܗ ܡܝܩܪܐ ( ܐܘܓܼܢܐ) ܚܕ ܟܬܒܐ ܚܕܪ ܝܘܪܬܢܐ ܕܒܨܘܪ̈ܘܬܐ ܘܣܘܪ̈ܛܝܗܝ݂ ܐܝܟ ܕܫܢܐ ܠܡܝܩܪܘܬܗ ܩܢܨܠܐ ܐܡܪܝܟܝܐ .

ܘܡܘܩܪܒܠܗ ܡܝܩܪܐ ( ܒܪܢܪܕ ܝܘܣܦ) ܡܕܒܪܢܐ ܕܒܝܬ ܥܬܩ̈ܐ ܣܘܪܝܝܐ ܠܡܝܩܪܘܬܗ ܩܢܨܠܐ ܐܡܪܝܟܝܐ، ܚܕ ܩܛܥܐ ܡܢ ܦܘܠܚܢ̈ܐ ܕܐܝܕܐ ܕܫܕܬܢܝ̈ܬܐ ܕܒܝܬ ܥܬܩ̈ܐ، ܚܒܫ ܢܩܫܐ ܕܬܘܪܐ ܕܓܘܠܦܢ̈ܐ ( ܠܡܣܘ) ، ܒܬܪ ܗܕܟ ܡܣܘܓܠܢܗ ܣܥܘܪܐ ܡܡܠܗ ܓܘ ܣܓܠܐ ܕܣܥܘܪ̈ܘܬܐ، ܘܡܘܥܒܪܗ ܓܘܗ ܥܠ ܕܡܝܪܘܬܗ ܠܟܠ ܡܐ ܕܚܙܐܠܗ ܘܐܝܩܪܗ ܠܟܠܝܗܝ ܥܡܠ̈ܐ ܡܘܩܪܒܐ ܒܢܛܪܬܐ ܘܬܪܨܬܐ ܕܐܗܐ ܝܘܪܬܢܐ ܫܪܫܝܐ ܘܡܩܪܒܬܗ ܠܝܘܒܠ̈ܐ ܐܬܝܢ̈ܐ ܒܚܕ ܐܣܟܝܡܐ ܫܦܝܪܐ .

Leave a Comment

Your email address will not be published. Required fields are marked *

Share via
Copy link
Powered by Social Snap