ܒܛܘܝܒܐ ܕܡܪܘܬܗ ܕܡܝܛܪܦܘܠܝܛܐ ܡܪܝ ” ܦܘܠܘܣ ܬܼܒܬ ܚܒܝܒ” ܪܥܝܐ ܕܡܪܥܝܬܐ ܕܐܠܩܘܫ ܟܠܕܝܬܐ، ܘܥܡ ܡܢܝܢܐ ܡܢ ܐܒܗ̈ܬܐ ܟܗܢ̈ܐ، ܘܡܝܩܪܐ ” ܟܠܕܘ ܪܡܙܝ ܐܘܓܼܢܐ” ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܘܡܝܩܪܐ “ܒܪܢܪܕ ܝܘܣܦ” ܡܕܒܪܢܐ ܕܝܪܬܘܬܐ ܘܒܝܬ ܥܬܩ̈ܐ ܣܘܪܝܝܐ، ܘܡܝܩܪܐ ” ܪܐܐܕ ܓ̰ܪܓ̰ܝܣ” ܡܕܒܪܢܐ ܕܡܪܕܘܬܐ ܣܘܪܝܝܬܐ/ ܕܗܘܟ ܘܟܢܫܐ ܪܒܐ ܡܢ ܒܢ̈ܝ ܐܠܩܘܫ ܘܩܘܪ̈ܝܐ ܘܦܢ̈ܝܬܐ ܩܪ̈ܝܒܐ ، ܡܫܘܪܐܠܗܘܢ ܓܘ ܐܠܩܘܫ ܥܒܘܕܘ̈ܬܐ ܕܝܘܡܐ ܬܠܝܬܝܐ ܡܢ ܫܒܘܥܐ ܡܪܕܘܬܢܝܐ ܣܘܪܝܝܐ 2022 ܗܘ ܕܡܛܟܣܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܓܘ ܐܘܢܐ ܕ(ܐܠܐܘܡܪܐܐ- الامراء)، ܒܪܡܫܐ ܕܝܘܡ ܫܒܬܐ 10 ܟܢܘܢ ܩܕܡܝܐ 2022 ، ܒܩܝܨܬܐ ܕܫܪܝܛܐ ܘܦܘܬܚܐ ܕܒܝܬ ܓܠܚܐ ܕܦܘܠܚܢ̈ܐ ܕܐܝܕܐ ܘܦܘܠܚܢ̈ܐ ܝܪ̈ܬܘܬܢܝܐ ܒܫܘܬܦܬܐ ܕܡܢܢܝܐ ܡܢ ܒܢܝ̈ ܥܡܢ ܝܗܝܒ̈ܐ ܓܘ ܐܘܡܢ̈ܘܬܐ ܕܐܝܕܝܐ ܘܝܪܬܘܬܐ. ܒܬܪ ܗܕܟ ܡܫܘܪܐܠܗܘܢ ܥܒܘܕܘ̈ܬܐ ܒܚܕ ܡܡܠܐ ܕܩܒܠܬܐ ܒܫܝܢܐ ܒܝܕ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܐ̄ܡܪܗ ܓܘܗ : ” ܡܢ ܐܠܩܘܫ ، ܟܕ ܕܝܪܐ ܘܡܕܪܫܬܐ ܕܡܪܝ (ܡܝܟܐ ܢܘܗܕܪܝܐ)، ܡܢ ܐܠܩܘܫ ، ܡܕܝܢ̄ܬܐ ܕܡܚܫܒܢܐ ܪܒܐ ܡܪܝ (ܬܐܘܡܐ ܐܘܕܘ) ܡܠܫܢܢܐ ܣܘܪܝܝܐ ܪܒܐ ܗܘ ܕܣܝܡܠܗ ܠܟܣܝܩܘܢ̈ܐ ܢܛܪܝܗܝ ܠܫܢܢ ، ܡܢ ܐܠܩܘܫ ܟܕ ܕܝܪܐ ܕܪܒܢ ܗܘܪܡܙ ܘܬܠܡܝܕ̈ܐ ܐܢܝ ܕܣܝܡܠܗܘܢ ܐܠܦܝ̈ܐ ܕܟܬܒ̈ܐ ܕܦܝܫ̈ܐܝܠܗܘܢ ܗܠ ܐܕܝܘܡ ، ܐܚܢܝ ܠܐܟܐ ܐܡܝܢܝ̈ܐܝܗ̄ܘܚ ܒܡܐܙܠܬܐ ܕܐܡܢܐ ܘܡܪܕܘܬܐ ܘܡܒܥܢܘܬܐ ܣܘܪܝܝܬܐ، ܐܡܝܢܝ̈ܐܝܗ̄ܘܚ ܒܡܐܙܠܬܐ ܕܐܒܗܬܝ̈ܢ.. ܐܚܢܝ ܥܡܘܟܢ ܝܗ̄ܘܚ ܒܐܚܕܕܐ ܒܐܢܝ ܥܒܘܕܘ̈ܬܐ ܕܫܒܘܥܐ ܡܪܕܘܬܢܝܐ ܣܘܪܝܝܐ ܗܘ ܕܡܛܣܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢܑܐ ܣܘܪ̈ܝܝܐ، ܕܗܘܚ ܥܡ ܚܕ ܝܘܡܐ ܝܪܬܘܬܢܝܐ ܦܪܝܫܐ، ܕܟܪ ܠܕܥܒܪ ܡܫܒܚܐ ܘܡܝܩܪܐ ܠܕܥܬܝܕ ܩܘܝܠܐ. ܐܝܬܠܢ ܩܘܒܠܛܝܒܘܬܐ ܠܐܡܝܢܝܘܬܘܟܢ ܘܣܢܕܬܘܟܢ، ܘܐܝܬܠܢ ܣܒܪܐ ܕܦܝܫܝ ܐܡܝܢܝ̈ܐ ܘܙܝܕܝ ܥܒܘܕܘ̈ܬܢ ܡܫܘܬܦ݁̈ܐ ܒܕܥܬܝܕ. ܘܪܡܙܠܗ ܠܐܠܩܘܫ ܘܥܢܟܒܐ ܘܒܛܢܝܐ ܘܬܠܣܩܘܦ ܘܢܘܗܕܪܐ ܘܙܟܼܘ، ܟܠܝܗܝ ܐܪܥܢ ܝܠܝܗܝ، ܘܚܘܒܝܗܝ ܝܠܗ ܒܠܒܘܬܢ. ܒܬܪ ܗܕܟ ܐ̄ܬܝܠܗ ܡܡܠܐ ܕܪܥܝܐ ܕܡܪܥܝܬܐ ܕܐܠܩܘܫ ܟܠܕܝܬܐ ܡܪܘܬܗ ܕܡܝܛܪܦܘܠܝܛܐ ܡܪܝ “ܦܘܠܘܣ ܬܼܒܬ ܚܒܝܒ” ܐ̄ܡܪܗ ܓܘܗ : ܐܚܢܝ ܐܕܝܘܡ ܝܗ̄ܘܚ ܒܚܠܘܠܐ ܟܡ ܥܒܕܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܘܒܟܠ ܚܠܘܠܐ ܟܡܣܩܠܐ ܟܠܘܿ، ܘܐܪܥܢ ܟܠܘ ܐܕܝܘܡ ܡܣܘܩܠܬܐܝܠܗܿ ܒܡܪܕܘܬܢ ܘܠܫܢܢ ܘܗܝܡܢܘܬܢ ܘܒܟܠ ܡܢܕܝ ܕܒܚܙܝܐܗ̄ܘܚ ، ܘܡܕܟܪܢ ܘܡܕܟܪ ܟܠܗ ܥܠܡܐ ܕܐܚܢܝ ܝܗ̄ܘܚ ܐܢܝ ܓܢ̄ܒܪ̈ܐ ܕܒܢܐܠܗܘܢ ܗܝ ܡܕܝܢܝܘܬܐ ܘܡܫܘܬܣܠܗܘܢ ܗܕ ܡܪܕܘܬܐ ܕܟܠܢ ܚܦܛܢܚ ܠܐܡܝܢܝܘܬܗܿ ܘܦܝܫܬܗܿ ܫܒܘܩ ܡܢ ܣܩܘܒܠܝ̈ܘܬܐ ܪ̈ܒܐ، ܘܪܡܙܠܗ ܠܐܢܢܩܝܘܬܐ ܕܝܠܦܝ ܝܠܕ̄ܝ̈ܢ ܘܝܘܒܠܝ̈ܢ ܐܬܝܢ̈ܐ ، ܠܫܢܢ ܣܘܪܝܝܐ، ܘܡܚܘܬܬܠܗ ܕܗܡܙܡܬܐ ( ܚܟܝܐ) ܕܫܒܪ̈ܐ ܒܠܫܢܐ ܐܢܓܠܝܙܝܐ ܠܐܝܠܗ ܚܕ ܫܘܒܗܪܐ ܒܪܩܘܒܠ ܗܡܙܡܬܝܗܝ ܒܠܫܢܐ ܕܐܒܗܬܝ̈ܗܝ ܠܫܢܐ ܣܘܪܝܝܐ، ܘܝܠܗ ܠܫܢܐ ܕܡܪܢ ܝܫܘܥ ܡܫܝܚܐ. ܒܬܪ ܗܕܟ ܡܘܩܪܒܠܗܘܢ ܡܢܝܢܐ ܡܢ ܒ̈ܢܬܐ ܕܡܕܪܫܬܐ ܕܐܠܩܘܫ ܫܪܘܝܬܐ ܕܒܢ̈ܬܐ، ܘܐܢܝ ܠܒܝܫ̈ܐ ܠܒܘܫ̈ܐ ܦܠܟܠܘܪ̈ܝܐ ܝܪ̈ܬܘܬܢܝܐ ܐܠܩܘܫܝ̈ܐ، ܙܡܝܪܬܐ ܒܠܫܢܐ ܣܘܪܝܝܐ، ܒܬܪ ܗܕܟ ܚܕ ܓܠܚܐ ܠܫܒܼܪ̈ܐ ܕܡܠܦܢܘܬܐ ܡܫܝܚܝܬܐ ܒܐܠܩܘܫ ܘܒܬܪ ܡܢܗ ܚܕ ܓܠܚܐ ܪܩܕܝܐ ܕܝܗܠܐ ܕܒܪܡܝܐ ܐܬܝܢܐ ܡܢ ܒܝܬ ܙܐܠܝܢ / ܩܡܫܠܝ ܒܣܘܪܝܐ. ܘܐܦ ܗܕܟ ܦܝܫܠܗܘܢ ܥܒܝܕܐ ܒܝܘܡܐ ܬܠܝܬܝܐ ܥܒܘܕܘ̈ܬܐ ܡܢ ܫܒܘܥܐ ܡܪܕܘܬܢܝܐ ܣܘܪܝܝܐ ܚܒܫܠܗ ܡܩܪܒܬܐ ܕܓܠܚܬܐ ܕܠܒܘܫ̈ܐ ܝܪ̈ܬܘܬܢܝܐ ܦܠܟܠܘܪ̈ܝܐ ܕܩܘܪ̈ܝܐ ܘܦܢܝ̈ܬܐ ܡܫܚܠܦ̈ܐ ܕܥܡܢ ، ܒܬܪ ܗܕܟ ܒܣܡܠܗܘܢ ܡܛܝܒ̈ܐ ܒܢܘܩܙ̈ܐ ܙܡܝܪ̈ܝܐ ܕܐܡܢ̈ܐ ܕܥܡܢ ( ܕܐܢܝ ܐܣܡܪ ، ܡܐܪܬܢ ܗܘܪܡܙ ، ܘܐܡܢܐ ܡܫܡܗܐ ܝܘܣܦ ܥܙܝܙ) ، ܘܚܒܫܠܗ ܐܦ ܗܕܟ ܡܩܪܒܬܐ ܕܚܕ ܚܙܘܐ ܒܐܡܝܐ ܒܫܡܐ ܕ( ܚܡܬܐ ܘܟܠܬܐ) ، ܡܢ ܡܦܩܢܘܬܐ “ܪܐܐܕ ܓ̰ܓ̰ܘܿ” ܘܡܩܛܥܐ ܡܢ ܢܩܫܬܐ ܠܚܘܕܝܬܐ ܥܠ ܡܐܢܐ ܕ(ܢܝ) ܒܝܕ “ܐܣܥܕ ܐܢܘܪ” ܘܐܝܬܗ̄ܘܐܠܗ ܝܗܠܐ ܕܒܪܡܝܐ ܚܕ ܛܘܝܒܐ ܦܪܝܫܐ ܓܘ ܡܩܪܒܬܐ ܕܓܠܚ̈ܐ ܐܡܢܝ̈ܐ ܪ̈ܩܕܝܐ. ܘܝܗ̄ܘܘ ܦܪ̈ܝܫܐ ܥܒܘܕܘ̈ܬܐ ܕܝܘܡܐ ܝܪܬܘܬܢܝܐ، ܒܡܩܪܒܬܐ ܕܡܐܟܼܠ̈ܐ ܥܡܡܝ̈ܐ ܘܐܘܡܢܘܬܐ ܕܠܚܡܐ ܒܐܕܫ̈ܗ ܘܡܩܪܒܬܗ ܫܚܝܢܐ ܠܡܛܝܒ̈ܐ ، ܘܟܒܐ ܦܠܟܠܘܪܝܐ ܘܡܐܟܠ̈ܐ ܥܡܡܝ̈ܐ ܐ̄ܚܪ̈ܢܐ. ܘܦܝܫ ܕܟܝܪܐ ، ܕܫܒܘܥܐ ܡܪܕܘܬܢܝܐ ܣܘܪܝܝܐ 2022 ܐܡܝܢܝܐܝܠܝܗܝ ܥܒܘܕܘ̈ܬܗ ܠܡܬܚܐ ܡܢ 8-12 ܟܢܘܢ ܩܕܡܝܐ 2022 ܡܫܢܝܢܐ ܡܢ ܢܘܗܕܪܐ- ܕܗܘܟ ܠܐܠܩܘܫ ܘܬܠܣܩܘܦ ܓܘ ܕܫܬܐ ܕܢܝܢܘܐ ، ܒܬܪ ܗܕܟ ܒܕ ܚܬܡ ܦܘܠܚܢ̈ܗ ܓܘ ܙܟܼܘܿ ، ܘܚܒܫ ܚܘܪܙܗ ܡܢܝܢܐ ܡܫܚܠܦܐ ܡܢ ܟܫܝܪ̈ܘܬܐ ܡܪ̈ܕܘܬܢܝܐ ܘܒܬܝ̈ ܓܠܚ̈ܐ ܐܡܢܝ̈ܐ ܘܝܬܒܼܝ̈ܬܐ ܕܘܪ̈ܫܝܐ ܐܢܝ ܕܡܫܘܬܦܝ ܓܘܝܗܝ ܡܢܝܢܐ ܡܢ ܡܒܥܢ̈ܐ ܡܢ ܒܢܝ ܥܡܢ ، ܘܡܘܥܕܢ ܒܨܦܪܐ ܝܠܗ ܒܬܠܣܩܘܦ .
