بەڕێوەبەرایەتی گشتی ڕۆشنبیرى و هونەری سریانی لە حکومەتی هەرێمی کوردستان ، لە پەیوەندیە فەرمییەکانیدا لەگەڵ بەڕێوەبەرایەتی و دامەزراوە حکومییەکانی ناوەندی قەزای عەنکاوە، هەروەها دامودەزگا حکومییەکانی پەیوەندیدار بە زمانی سریانی لە سەرتاسەری هەرێم، دەستی کردووە بە گرتنەبەری بەکارهێنانى زمانی سریانی.
ئەم هەنگاوە ناوازەیە بۆ بەهێزکردن و چەسپاندنی بەکارهێنان و پەرەپێدانی زمانی سریانی هاتووە، کە لە یاسای پاراستنی مافی پێکهاتەکان لە کوردستان ساڵی ٢٠١٥ پەسەند کرا، بەمەبەستی پاراستن و زامنی سیاسی، مەدەنی، کۆمەڵایەتی و مافی کولتووری پێکهاتەکان لە ناوچەکەدا.
