ܣܥܪܠܗ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܒܚܒܪܘܬܐ ܥܡ ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ ܒܫܘܠܛܢܘܬܐ ܕܩܠܝܡܐ ܡܝܩܪܐ “ܐܢܘ ܓ̰ܘܗܪ” ܘܡܛܦܣܢܝܬܐ ܕܫܘܠܛܢܘܬܐ ܕܩܠܝܡܐ ܓܘ ܘܫܢܛܢ ܡܝܩܪܬܐ “ܬܪܝܦܐ ܥܙܝܙ” ܣܥܪܠܗ ܠܫܘܬܐܣܐ ܕܓܠܘܝܘܬܐ ܟܠܕܝܬܐ ܓܘ ܕܝܬܪܘܝܬ ܒܬܪ ܫܘܬܦܬܝܗܝ ܓܘ ܙܘܝܚܐ ܕܐ̄ܟܠܪܡܫܐ ܫܢ̄ܬܢܝܐ ܗܘ ܕܩܝܡܠܗ ܒܓܘܗ ܫܘܬܐܣܐ ܓܘ ܡܕܝܢ̄ܬܐ ܕܕܝܬܪܘܝܬ ܒܐܘܚܕܢܐ ܕܡܫܝܓܐܢ ܐܡܪܝܟܝܐ ܒܝܘܡܐ ܕܫܒܬܐ 23 ܐܝܠܘܠ 2023.
ܘܝܗ̄ܘܐ ܒܣܩܒܠܬܐ ܕܡܫܕܪܘܬܐ “ܡܐܪܬܢ ܡܢܢܐ” ܪܫܐ ܕܫܘܬܐܣܐ ܘܡܢܝܢܐ ܡܢ ܗܕܡ̈ܐ ܕܓܘܫܡܐ ܡܕܒܪܢܝܐ.
ܘܒܡܬܚܐ ܕܣܥܘܪܘܬܐ، ܡܘܩܪܒܠܗ “ܐܘܓܼܢܐ” ܠܫܘܬܐܣܐ ܢܘܣܟܼܐ ܡܢ ܣܦܪܐ ܕܫܘܡܠܝ̈ܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܐܢܝ ܕܦܝܫܠܗܘܢ ܡܫܘܪܪܐ ܒܡܬܚܐ ܕܚܕܐ ܫܢ̄ܬܐ ܒܥܕܢܐ ܕܟܒܝܢܬܐ ܬܫܝܥܝܬܐ ܕܫܘܠܛܢܘܬܐ ܕܩܠܝܡܐ ܕܟܘܪܕܣܬܢ.
ܘܬܦܩܠܗ “ܐܘܓܼܢܐ” ܒܚܒܪܘܬܐ ܕ”ܓ̰ܘܗܪ” ܘ”ܡܢܢܐ” ܒܪܫܐ ܕܩܢܛܪܘܢ ܡܪܕܘܬܢܝܐ ܟܠܕܝܐ ܓܘ ܕܝܬܪܘܝܬ “ܓ̰ܘܕܝ ܓ̰ܘܢܐ” ܘܡܕܒܪܢܝܬܐ ܣܘܥܪܢܝܬܐ ܕܩܢܛܪܘܢ “ܘܐܡ ܢܥܡܘ” ܒܝܘܡܐ ܕܬܪܝܢܒܫܒܐ 25 ܐܝܠܘܠ 2023 ، ܘܕܪܫܠܗܘܢ ܬܪܘܝܗܝ ܓܢ̄ܒܢ̈ܐ ܚܕܪ ܫܒܝܠ̈ܐ ܕܥܘܕܪܢܐ ܘܚܘܠܦܐ ܕܒܚܝܪ̈ܘܬܐ ܘܥܡ ܕܘܪܫܐ ܕܛܟܣܬܐ ܕܥܒܘܕܘ̈ܬܐ ܡܫܘܬܦ̈ܐ ܒܝܢܬ ܩܢܛܪܘܢ ܘܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ.
ܘܦܝܫ ܕܟܝܪܐ، ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܡܫܘܬܦܠܗ ܓܘ ܙܘܝܚܐ ܕܐ̄ܟܠܪܡܫܐ ܫܢ̄ܬܢܝܐ ܗܘ ܕܩܝܡܠܗ ܒܓܘܗ ܫܘܬܐܣܐ ܕܓܠܘܝܘܬܐ ܟܠܕܝܬܐܓܘ ܡܕܝܢ̄ܬܐ ܕܕܝܬܪܘܝܬ ܒܐܘܚܕܢܐ ܕܡܫܝܓܐܢ ܐܡܪܝܟܝܐ ܒܝܘܡܐ ܕܥܪܘܒܬܐ 22 ܐܝܠܘܠ 2023.
