ܫܘܬܦܠܗܿ ܡܫܕܪܘܬܐ ܡܢ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܒܝܘܡ ܬܪܝܢܒܫܒܐ 4 ܬܫܪܝܢ ܬܪܝܢܐ 2024، ܒܚܘܪ̈ܩܢܐ ܕܟܡ ܥܒܕܐܠܗܘܢ ܩܢܨܠܝܘܬܐ ܐܡܪܝܟܝܬܐ ܓܘܢܝܬܐ ܒܐܪܒܝܠ، ܒܦܘܪܣܐ ܕܝܘܡܐ ܐܬܪܢܝܐ ܐܡܪܝܟܝܐ، ܒܛܘܝܒܐ ܕܪܫ ܘܙܝܪ̈ܐ ܕܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܡܝܩܪܐ (ܡܣܪܘܪ ܒܐܪܙܢܝ) ܘܐܝܙܓܕܬܐ ܕܘܫܢܛܘܢ ܓܢ̄ܒ ܥܝܪܩ ( ܐܠܝܢܐ ܪܘܡܐܢܘܣܟܝ)، ܘܩܢܨܠܐ ܓܘܢܝܐ ܒܐܪܒܝܠ (ܣܬܝܦ ܒܝܬܢܪ).
ܘܚܒܫܠܗܿ ܡܫܕܪܘܬܐ ܡܕܒܪܢܐ ܓܘܢܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܘܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ (ܒܪܢܐܪܕ ܝܘܣܦ) ܘܡܢܝܢܐ ܡܢ ܫܕܬܢ̈ܐ ܕܡܕܒܪܢܘܬܐ، ܘܐ̄ܬܝܠܗܿ ܫܘܬܦܬܗܿ ܒܩܪܝܬܐ ܡܢ ܩܢܨܠܝܘܬܐ ܐܡܪܝܝܟܝܬܐ ܒܐܪܒܝܠ، ܒܙܘܝܚܐ ܕܟܡ ܥܒܕܐܠܗܿ ܒܕܟܪܐ ܕ(248) ܠܫܬܐܣܬܐ ܕܐܘܚܕܢ̈ܐ ܡܚܝܕ̈ܐ ܐܡܪ̈ܝܟܝܐ، ܒܦܢܕܩܐ ܕܪܘܬܢܐ ܒܐܪܒܝܠ.
ܘܦܝܫܠܗܘܢ ܡܛܝܒ̈ܐ ܠܚܘܪ̈ܩܢܐ ܕܙܘܝܚܐ ܡܫܕܪܘܬܐ ܪܘܫܡܝܬܐ ܡܢ ܡܫܬܐܠܢ̈ܐ ܫܘܠܛܢܝ̈ܐ ܒܩܠܝܡܐ ܕܟܘܪܕܣܬܢ، ܘܡܢܝܢܐ ܡܢ ܦܪ̈ܨܘܦܐ ܣܝܣܝ̈ܐ ܘܦܘܪ̈ܢܣܝܐ ܘܗܕܡ̈ܐ ܕܦܠܚܘܬܐ ܕܝܦܠܘܡܛܝܩܝܬܐ ܘܡܡܬܠܢ̈ܐ ܕܐܬܪ̈ܘܬܐ ܒܐܪܒܝܠ، ܥܡ ܡܡܬܠܢ̈ܐ ܕܡܟܝܢ̈ܬܐ ܘܓܒ̈ܐ ܣܝܣܝ̈ܐ ܘܫܘܬܐܣ̈ܐ ܕܟܢܘܫܝܐ ܡܕܝܢܝܐ ܒܩܠܝܡܐ.
