ܡܫܘܬܦܠܗ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܓܘ ܚܘܪ̈ܩܢܐ ܕܩܒܪܬܐ ܕܐܡܢܐ ܘܡܚܘܪܐ “ܓ̰ܐܢ ܬܐܘܡܐܣ” ܠܡܫܟܢܗ ܐ̄ܚܪܝܐ ، ܒܨܦܪܐ ܕܝܘܡܐ ܕܚܡܫܒܫܒܐ 6 ܬܡܘܙ 2023 ܒܥܕܬܐ ܕܡܪܝ ܝܘܚܢܢ ܡܥܡܕܢܐ ܓܘ ܪܘܣܬܩܐ ܕܥܢܟܒܐ. ܘܦܝܫܠܗܘܢ ܡܛܝܒ̈ܐ ܠܐܢܝ ܚܘܪ̈ܩܢܐ “ܪܝܒܘܐܪ ܝܠܕܐ” ܗܕܕܡܐ ܕܡܟܬܒܐ ܣܝܣܝܐ ܕܓܒܐ ܕܝܡܘܩܪܛܝܐ ܟܘܪܕܣܬܢܝܐ، “ܦܪܗܢܟ ܓܼܦܿܘܪ” ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ/ ܐܪܒܝܠ، ܘܩܝܡܩܡܐ ܕܪܘܣܬܩܐ ܕܥܢܟܒܐ ܡܝܩܪܐ “ܪܐܡܝ ܢܘܪܝ ܣܝܐܘܫ” ܘܟܢܫܐ ܡܢ ܡܚܒܢ̈ܐ ܕܡܫܢܝܐ .
ܘܒܚܕ ܡܡܠܐ ܕܒܘܝܐܐ ܦܝܫܠܗ ܡܘܩܪܒܐ ܒܝܕ ܡܝܩܪܐ ” ܐܘܓܼܢܐ” ܚܩܪܗ ܓܘܗ ܒܓܪܐ ܪܒܐ ܕܐܝܬܗ̄ܘܐܠܗ ܡܫܢܝܐ ܒܬܫܡܫܬܐ ܕܐܡܢܐ ܓܘ ܟܘܪܕܣܬܢ ܒܡܬܒܬܐ ܕܩܝܢ̈ܬܐ ܠܙܡܪ̈ܝܬܐ ܩܘܪ̈ܕܝܐ ܘܫܘܬܦܬܗ ܒܡܢܝܢܐ ܡܢ ܝܗܠ̈ܐ ܐܡܢܝ̈ܐ ܟܘܪ̈ܕܣܬܢܝܐ ܘܥܡ ܬܫܡܫܬܐ ܕܥܕܬܐ، ܘܡܚܘܬܬܠܗ: ܕܡܫܢܝܐ ܝܗ̄ܘܐ ܪܡܙܐ ܕܚܝܝܬܐ ܐܚܘܬܢܝܬܐ ܓܘ ܩܠܝܡܐ.
ܘܡܘܒܝܢܗ “ܐܘܓܼܢܐ” ܕܡܘܗܒܬܐ ܕܡܫܢܝܐ ܠܐܗ̄ܘܐ ܥܠ ܫܘܝܐ ܕܡܘܣܝܩܐ ܒܠܚܘܕ، ܐܠܐ ܝܗ̄ܘܐ ܡܚܘܪܐ ܛܥܢܗ ܚܫ̈ܐ ܕܥܡܗ ܘܡܘܥܒܪܗ ܥܠܝܗܝ ܒܡܘܫ̈ܚܬܗ، ܘܦܪܝܫܐܝܬ ܡܫܘܚܬܐ ܕ( ܣܡܝܠܐ)، ܘܡܘܙܝܕܠܗ “ܐܘܓܼܢܐ” ܒܐ̄ܡܪܐ : “ܐܕܝܘܡ ܟܫܒܩܚ ܒܫܝܢܐ ܡܫܡܫܢܐ “ܓ̰ܐܢ ܬܐܘܡܐܣ” ܘܟܕܟܪܚ ܟܠ ܐܢܝ ܕܫܘܢܐܠܗܘܢ ܡܢ ܒܢܝ̈ ܥܡܢ ܐܢܝ ܕܠܐ ܟܠܐܠܗܿ ܡܘܗܒܬܝܗܝ ܥܠ ܡܟܝܢܬܐ ܦܪܝܫܬܐ ܒܠܚܘܕ، ܐܠܐ ܡܫܘܬܦܠܗܘܢ ܓܘ ܛܘܪܢܬܐ ܕܙܘܥܐ ܡܪܕܘܬܢܝܐ ܘܐܡܢܝܐ ܟܘܪܕܣܬܢܝܐ ܒܐܣܟܝܡܐ ܓܘܢܝܐ”.
ܘܦܝܫ ܕܟܝܪܐ ܕܡܫܢܝܐ ܝܗ̄ܘܐ ܚܕ ܡܢ ܐܡܢ̈ܐ ܒܟܝܪ̈ܐ ܡܫܡܡܗ̈ܐ ܓܘ ܟܘܪܕܣܬܢ. ܫܘܬܦܠܗ ܓܘ ܫܬܐܣܬܐ ܕܝܗܠܐ (ܒܐܘܐܓ̰ܝ ܟܘܝܐ) ܘܝܗܠܐ ܕ(ܐܪܒܝܠ ܐܡܢܝܐ)، ܘܚܒܫ ܐܪܫܝܦܗ ܡܢܝܢܐ ܡܢ ܩܝܢ̈ܬܐ ܙܡܝܪ̈ܝܐ ܘܣܘܓܼܝ̈ܬܐ ܥܕܬܢܝ̈ܐ، ܘܥܡ ܫܩܠܬܗ ܪܫܢܘܬܐ ܕܬܚܒܪܬܐ ܕܐܡܢ̈ܐ ܘܥܡ ܦܘܠܚܢܗ ܬܪܒܝܬܢܝܐ ܓܘ ܓܝܓܠܐ ܕܡܠܦܢܘܬܐ.
