ܣܘܩܒܠܗ ܡܝܩܪܐ “ܟܠܕܘ ܪܡܙܝ ܐܘܿܓܼܢܐ” ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܐܝܙܓܕܘܬܐ ܡܢ ܫܘܬܐܣܐ ܕܐܠܦ ܬܘ ܝܨܘܦ̈ܐ ܒܡܠܦܢܘܬܐ ܣܘܪܝܝܬܐ ܐܬܝܢ̈ܐ ܡܢ ܩܡܫܠܝ/ ܣܘܪܝܐ، ܓܘ ܒܢܝܢܐ ܕܡܕܒܪܢܘܬܐ ܓܘܢܝܬܐ ، ܝܘܡܐ ܕܚܕܒܫܐ 20 ܬܫܪܝܢ ܬܪܝܢܐ 2022 . ܘܕܪܫܠܗܘܢ ܓܘ ܬܦܩܬܐ ܫܒܝ̈ܠܐ ܕܣܢܕܬܐ ܕܥܘܕܪܢܐ ܡܫܘܬܦܐ ܥܠ ܫܘܝܐ ܕܛܘܘܪܐ ܕܠܫܢܐ ܣܘܪܝܝܐ ܘܢܛܪܬܐ ܕܐܡܝܢܝܘܬܗ ܠܬܫܡܫܬܐ ܕܡܪܕܘܬܐ ܘܠܫܢܐ ܕܥܡܢ ܓܘ ܟܠܝܗܝ ܦܢܝ̈ܬܐ ܕܐܝܬܘܬܗ. ܘܡܘܥܒܪܗܿ ܐܝܙܓܕܘܬܐ ܣܥܘܪܬܐ ܥܠ ܬܡܝܗܘܬܗܿ ܘܐܝܩܪܗܿ ܠܡܐ ܕܡܛܐܠܗܿ ܥܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܢ ܛܘܘܪܐ ܓܠܝܐ ܘܟܫܝܪ̈ܘܬܐ ܥܒܼܘܿܕ̈ܐ ܒܡܕܒܪܢܘܬܗܿ ܚܕܬܐ. ܘܡܢ ܓܢ̄ܒܗ ܡܘܩܪܒܠܗ “ܐܘܿܓܼܢܐ” ܩܘܒܠܛܝܒܘܬܐ ܠܐܝܙܓܕܘܬܐ ܣܥܘܪܬܐ ܘܡܚܘܬܬܠܗ ܕܬܪ̈ܥܐ ܕܡܕܒܪܢܘܬܐ ܓܘܢܝܬܐ ܦܬܝܚ̈ܐܝܠܗ̄ܘܢ ܠܟܠܝܗܝ ܘܕܠܐ ܦܘܪܫܢܐ ܘܡܘܥܒܪܗ ܥܠ ܛܘܝܒܗ ܐܡܝܢܝܐ ܠܥܘܕܪܢܐ ܥܡ ܟܠܝܗܝ ܫܘܬܐܣ̈ܐ ܕܥܡܢ ܠܬܫܡܫܬܐ ܕܡܪܕܘܬܐ ܣܘܪܝܝܬܐ ܘܙܥܦܬܐ ܕܡܐܙܠܬܗܿ ܠܩܕ̄ܡܐ.
