ܒܛܘܝܒܐ ܕܡܪܝ “ܐܒܪܣ ܝܘܚܢܢ” ܡܛܦܣܢܐ ܕܩܕܝܫܘܬܗ ܕܡܪܝ “ܐܒܐ ܬܠܝܬܝܐ ܪܘܐܝܠ” ܦܛܪܝܪܟܐ ܕܥܕܬܐ ܕܡܕܢܚܐ ܕܐܬܘܪ̈ܝܐ ، ܘܡܪܝ “ܦܘܠܘܣ ܬܼܒܬ ܚܒܝܒܿ” ܡܝܛܪܦܘܠܝܛܐ ܕܐܠܩܘܫ ܕܟܠܕܝ̈ܐ ، ܘܡܝܩܪܐ “ܐܢܘ ܓ̰ܘܗܪ ” ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ، ܘܕ.” ܣܐܠܪ ܥܘܬܡܢ” ܘܟܝܠܐ ܕܘܙܝܪܘܬܐ ܕܡܪܕܘܬܐ ܘܥܠܝܡ̈ܐ ، ܘ”ܥܠܝ ܬܬܪ” ܗܘܦܪܟܐ ܕܕܗܘܟ ܘܡܢܝܢܐ ܡܢ ܗܕܡ̈ܐ ܕܦܪܠܡܢ ܕܩܠܝܡܐ ܕܟܘܪܕܣܬܢ ܘܟܢܫܐ ܪܒܐ.
ܘܡܫܘܪܐܠܗܘܢ ܓܘ ܐܘܢܐ ܕ(ܡܚܡܕ ܥܐܪܦ ܓ̰ܙܝܪܝ) ܒܢܘܗܕܪܐ، ܝܘܡ ܚܡܫܒܫܒܐ 8 ܟܢܘܢ ܩܕܡܝܐ 2022 ، ܥܒܘܕܘ̈ܬܐ ܕܫܒܘܥܐ ܡܪܕܘܬܢܝܐ ܣܘܪܝܝܐ 2022 ܗܘ ܕܡܛܟܣܐܠܗ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܘܡܕܒܪܢܘܬܐ ܕܡܪܕܘܬܐ ܣܘܪܝܝܬܐ / ܕܗܘܟ. ܒܛܘܝܒܐ ܪܘܫܡܝܐ ܘܟܢܫܝܐ ܦܪܝܫܐ، ܘܒܕ ܡܓܪܫܝ ܥܒܘܕܘ̈ܬܗ ܡܫܢܝܢ̈ܐ ܒܝܢܬ ܢܘܗܕܪܐ- ܐܠܩܘܫ- ܬܠܣܩܘܦ- ܙܟܼܘܿ، ܠܡܬܚܐ ܡܢ 8 ܗܠ 12 ܟܢܘܢ ܩܕܡܝܐ 2022.
ܡܫܘܪܐܠܗ ܙܘܝܚܐ ܥܒܘܕܘܬܗ ܒܚܕ ܠܘܚܐ ܐܡܢܝܐ ܪܩܕܝܐ ܦܝܫܠܗ ܡܘܩܪܒܐ ܒܝܕ ܝܗܠܐ ܕܒܪܡܝܐ ܣܘܪܝܝܐ ܐܬܝܢܐ ܡܢ ܒܝܬ ܙܐܠܝܢ/ ܩܡܫܠܝ ܒܣܘܪܝܼܐ، ܒܬܪ ܗܕܟ ܡܡܠܐ ܕܗܘܦܪܟܐ ܕܕܗܘܟ ܕ.”ܥܠܝܼ ܬܬܪ” ܗܘ ܕܪܡܙܠܗ ܓܘܗ ܒܥܒܕܬܐ ܕܗܢ ܫܒܘܥܐ ܡܪܕܘܬܢܝܐ ܣܘܪܝܝܐ ܓܘ ܕܗܘܟ ܝܠܗ ܚܕ ܛܘܦܣܐ ܠܚܝܝܬܐ ܐܚܘܬܢܝܬܐ ܒܝܢܬ ܟܠܝܗܝ ܡܟܝܢ̈ܬܐ ܓܘ ܗܘܦܪܟܐ، ܘܪܡܙܠܗ ܠܥܘܡܩܐ ܕܥܩܪ̈ܐ ܕܡܪܕܘܬܐ ܣܘܪܝܝܬܐ ܐܢܝ ܡܬܝܚ̈ܐ ܠܐܠܦܝ̈ܐ ܕܫܢ̈ܐ ܩܕܡ ܡܘܠܕܐ، ܘܐܝܬܗ̄ܘܐܠܗܿ ܚܕ ܓܪܐ ܪܒܐ ܓܘ ܡܕܝܢܝ̈ܘܬܐ ܐܚܪ̈ܢܐ، ܘܐܦ ܦܣܩܠܐ ܠܫܢܗܿ ܥܠ ܡܕܝܢܝܘ̈ܬܐ ܐ̄ܚܪ̈ܢܐ ܟܬܝܒܬܐ ܘܩܪܝܬܐ، ܘܡܚܘܬܬܠܗ ܥܠ ܝܨܝܦܘܬܐ ܕܫܘܠܛܢܘܬܐ ܕܩܠܝܡܐ ܒܡܦܪܝܬܐ ܕܫܒܝܠ̈ܐ ܚܫܝܚ̈ܐ ܠܬܫܡܫܬܐ ܘܛܘܘܪܐ ܕܗܢ ܠܫܢܐ ܘܢܛܪܬܗ.
ܘܒܬܪ ܗܕܟ ܡܡܠܐ ܕܘܙܝܪܘܬܐ ܕܡܪܕܘܬܐ ܘܥܠܝܡ̈ܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ، ܦܝܫܠܗ ܡܘܩܪܒܐ ܒܝܕ ܕ.” ܣܐܠܪ ܥܘܬܡܢ ” ܘܟܝܠܐ ܕܘܙܝܪܐ، ܡܚܘܬܬܠܗ ܓܘܗ ܥܠ ܐܢܢܩܝܘܬܐ ܕܚܝܝܬܐ ܐܚܘܬܢܝܬܐ ܓܘ ܩܠܝܡܐ ܘܪܡܙܠܗ ܕܘܙܝܪܘܬܐ ܐܝܬܠܗ ܝܨܝܦܘܬܐ ܪܒܬܐ ܒܡܪ̈ܕܘܬܐ ܕܡܟܝܢ̈ܬܐ، ܟܕ ܠܝܬܠܢ ܟܘܝܢܐ ܙܥܘܪܐ ܘܟܘܝܢܐ ܪܒܐ ، ܟܕ ܟܠܝܗܝ ܐܝܬܠܗܘܢ ܝܬ ܐܝܩܪܐ ܘܪܥܝܘܬܐ ܘܝܨܝܦܘܬܐ، ܘܚܩܪܗ، ܒܥܠܬܐ ܕܝܠܗ ܡܛܦܣܢܐ ܕܘܙܝܪܐ ܕܡܪܕܘܬܐ، ܒܥܡܠ̈ܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܡܘܩܪܒܠܗ ܩܘܒܠܛܝܒܘܬܗ ܠܡܕܒܪܢܗܿ ܓܘܢܝܐ ܡܝܩܪܐ ” ܟܠܕܘ ܪܡܙܝ ܐܘܓܢܐ” ܘܟܕܝܪ̈ܗܿ ܥܠ ܥܡܠܝܗܝ ܓܘ ܛܘܟܣܐ ܕܥܒܘܕܘ̈ܬܐ ܘܟܫܝܪ̈ܘܬܐ ܦܪ̈ܝܫܐ ܘܡܚܘܬܬܠܗ ܒܣܢܕܬܐ ܕܘܙܝܪܕܘܬܐ ܠܡܕܒܪܢܘܬܐ ܘܥܒܘܕܘܬ̈ܗܿ ܡܫܚܠܦ̈ܐ، ܘܠܟܠܝܗܝ ܡܕܒܪ̈ܘܬܐ ܓܘܢܝ̈ܐ ܐ̄ܚܪ̈ܢܐ ܐܢܝ ܕܝܨܦܝ ܒܨܒܘ̈ܬܐ ܕܡܟܝܢ̈ܬܐ، ܘܕܠܐ ܥܒܪܬܐ ܒܫܘܓ̄ܠܝ̈ܗܝ .
ܘܒܬܪ ܗܕܟ ܐܬܝܠܗ ܡܡܠܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܦܝܫܠܗ ܡܘܩܪܒܐ ܒܝܕ ܡܕܒܪܢܗܿ ܓܘܢܝܐ ܡܝܩܪܐ” ܟܠܕܘ ܪܡܙܝ ܐܘܓܢܐ” ܡܘܝܕܠܗ ܓܘܗ ܠܫܪܝܬܐ ܕܫܒܘܥܐ ܡܪܕܘܬܢܝܐ ܣܘܪܝܝܐ 2022 ܕܗܘܐ ܚܕ ܢܘܩܙܐ ܕܫܪܝܬܐ ܠܚܝܠܢܬܐ ܕܙܘܥܐ ܡܪܕܘܬܢܝܐ ܓܘ ܢܘܗܕܪܐ ܘܚܕܪ̈ܘܢܗܿ ܡܢ ܩܘܪ̈ܝܐ ܘܦܢܝ̈ܬܐ ܘܡܕܝܢ̈ܬܐ ܕܒܢܝ̈ ܥܡܢ ، ܘܗܕܟ ܡܫܢܚ ܡܢ ܢܘܗܕܪܐ ܠܐܠܩܘܫ ܘܬܠܣܩܘܦ ܘܒܕ ܚܬܡܚ ܒܙܟܘܬܐ. ܘܡܚܬܬܚ ܕܐܓܪܬܢ ܝܠܗ ܦܘܬܚܐ ܠܐܚܕܕܐ ܘܗܘ ܐ̄ܚܪܢܐ، ܘܫܘܚܠܦܐ ܘܐܕܫܝܘܬܐ ܝܠܝܗܝ ܡܒܘܥܐ ܕܥܘܬܪܐ ܘܠܐ ܥܠܬܐ ܕܦܘܪܫܢܐ. ܡܫܪܚ ܒܐܘܪܚܐ ܕܡܪܕܘܬܐ ܠܦܘܬܚܐ ܥܠ ܓܝܢܢ ܘܥܠ ܡܪ̈ܕܘܬܐ ܐ̄ܚܪ̈ܢܐ . ܘܡܘܥܒܪܗ ܥܠ ܚܕܘܬܗ ܕ” ܗܘܚ ܐܕܝܘܡ ܥܡܘܟܢ، ܐܚܘܢ̈ܘܬܢ ܘܚܒܝܒܝ̈ܢ، ܠܐܟܐ ܓܘ ܢܘܗܕܪܐ-ܡܥܠܬܝܐ ܚܒܝܒܬܐ ܠܠܒܘܬܢ، ܟܕ ܡܫܘܬܐܣܠܗ ܡܕܪܫܬܐ ܡܫܡܗܬܐ ܢܦܩܠܗ ܡܢܗܿ ܡܪܝ “ܐܝܬ ܐܠܗܐ” ܘܡܪܝ “ܣܗܕܘܢܐ”، ܘܓܘ ܐܠܩܘܫ ، ܡܫܘܬܐܣܠܗ ܡܪܝ “ܡܝܟܼܐ ܢܘܗܕܪܝܐ ܡܕܪܫܬܗ ܡܫܡܗܬܐ.. ܠܚܬܝܬܘܬܐ ܕܓܪܐ ܡܪܕܘܬܢܝܐ ܘܡܠܦܢܘܬܢܝܐ ܓܠܝܐ ܕܥܡܢ ܒܝܘܪܟܐ ܕܕܪ̈ܐ”. ܒܬܪ ܗܕܟ ܡܘܩܪܒܠܗ “ܐܘܓܢܐ” ܕܘܪܥܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܠܡܛܦܣܢ̈ܐ ܕܟܢܘܫ̈ܝܬܐ ܫܘܬܦ̈ܐ ܓܘ ܫܒܘܥܐ ܡܪܕܘܬܢܝܐ.
ܘܒܬܪ ܗܕܟ ܢܩܫܬܐ ܡܘܣܝܩܝܬܐ ܥܡ ܙܡܝܪܬܐ ܣܘܪܝܝܬܐ ܦܝܫܠܗܿ ܡܘܩܪܒܬܐ ܒܝܕ ܐܘܪܟܣܬܪܐ ( ܝܗܠܐ) ܕܟܢܪܐ ܡܢ ܒܓܕܝܕܐ، ܐܪܫܟܝܬܐ ܕܡܪܕܘܬܐ ܣܘܪܝܝܬܐ.
ܘܦܝܫܠܗ ܓܠܝܚܐ ܓܘ ܙܘܝܚܐ ܦܝܠܡܐ ܟܪܝܐ ܒܫܡܐ ( ܢܘܗܕܪܐ)، ܚܒܫܠܗ ܬܫܥܝܬܐ ܕܗܕ ܡܕܝܢ̄ܬܐ ܫܪܫܝܬܐ ܘܥܘܡܩܐ ܕܥܩܪ̈ܗܿ ܡܢ ܩܕܝܡ ܘܩܐܡܗܿ ܒܗܪܢܐ. ܘܒܬܪ ܗܕܟ ܡܘܩܪܒܠܗܘܢ ܡܢܝܢܐ ܡܢ ܡܚܘܪ̈ܐ ܘܡܚܘܪ̈ܝܬܐ ܕܒܢܝ̈ ܥܡܢ ܡܫܘܚܝܬܝ̈ܗܝ ܘܝܗ̄ܘܘ ” ܦܛܪܘܣ ܢܒܬܝ “، “ܙܝܢܐ ܝܘܣܦ”، “ܡܝܢܐ ܐܘܝܬܪ ܨܕܩ” ،”ܢܡܪܘܕ ܩܫܐ”، ܘܒܬܪ ܗܕܟ ܢܘܩܙ̈ܐ ܡܘܣܝܩܝ̈ܐ ܕܝܗܠܐ ܕܟܢܪܐ.
ܒܬܪ ܗܕܟ ܡܫܘܪܐܠܗܘܢ ܦܘܠܚܢ̈ܐ ܕܝܬܒܬܐ ܕܘܪܫܝܬܐ ܚܕܪ ( ܩܐܡ ܕܙܡܝܪܬܐ ܣܘܪܝܝܬܐ) ܒܫܘܬܦܬܐ ܕܐܡܢܐ ܪܒܐ ܕܥܡܢ ” ܫܠܝܡܘܢ ܒܝܬ ܫܡܘܐܝܠ” ، ܘܡܚܘܪܐ “ܢܝܢܒ ܠܡܣܘ” ، ܘܐܡܢܐ “ܝܘܣܦ ܥܙܝܙ” ، ܘܝܗ̄ܘܐ ܒܬܓܒܪܬܐ ” ܠܝܬ ܒܢܝܡܢ ” . ܒܣܡܠܐ ܠܒܐ ܕܡܛܝܒ̈ܐ ܘܦܪܝܫܐܝܬ ܙܘܡܙܡܐ ܕܙܡܝܪ̈ܬܐ ܣܘܪ̈ܝܝܐ ܥܡ ܢܩܫܬܐ ܕܥܘܕ.
ܘܦܝܫܠܗ ܚܬܝܡܐ ܝܘܡܐ ܩܕܡܝܐ ܥܒܘܕܘ̈ܬܗ ܒܦܘܬܚܐ ܕܒܝܬ ܓܠܚܐ ܐܡܢܝܐ ܚܒܫܠܗ ܦܘܠܚܢ̈ܐ ܣܘܟܡܝ̈ܐ ܘܐ̄ܚܪ̈ܢܐ ܡܢ ܦܘܠܚܢ̈ܐ ܕܐܝܕܐ، ܘܥܡ ܒܝܬ ܓܠܚܐ ܐ̄ܚܪܢܐ ܚܒܫܠܗ ܦܪ̈ܝܣܬܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܢ ܫܫܠܬܐ ܕܡܪܕܘܬܐ ܣܘܪܝܝܬܐ.
ܘܦܝܫ ܕܟܝܪܐ ، ܕܫܒܘܥܐ ܡܪܕܘܬܢܝܐ ܣܘܪܝܝܐ 2022 ܒܕ ܡܓܪܫܝ ܥܒܘܕܘ̈ܬܗ ܠܡܬܚܐ ܡܢ 8-12 ܟܢܘܢ ܩܕܡܝܐ 2022 ܡܫܢܝܢܐ ܡܢ ܢܘܗܕܪܐ- ܕܗܘܟ ܠܐܠܩܘܫ ܘܬܠܣܩܘܦ ܓܘ ܕܫܬܐ ܕܢܝܢܘܐ، ܒܬܪ ܗܕܟ ܒܕ ܚܬܡ ܦܘܠܚܢ̈ܗ ܓܘ ܙܟܼܘܿ . ܘܚܒܫ ܚܘܪܙܗ ܡܢܝܢܐ ܡܫܚܠܦܐ ܡܢ ܟܫܝܪ̈ܘܬܐ ܡܪ̈ܕܘܬܢܝܐ ܘܒܬܝ̈ ܓܠܚ̈ܐ ܐܡܢܝ̈ܐ ܘܝܬܒܝ̈ܬܐ ܕܘܪ̈ܫܝܐ ܡܫܘܬܦܝ ܓܘܝܗܝ ܡܝܢܢܐ ܡܢ ܡܒܥܢ̈ܐ ܡܢ ܒܢܝ̈ ܥܡܢ.
