ܐ̄ܡܪܗ “ܪܐܐܕ ܓ̰ܪܓ̰ܝܣ”، ܡܕܒܪܢܐ ܕܡܪܕܘܬܐ ܣܘܪܝܝܬܐ ܓܘ ܕܗܘܟ، ܡܕܒܪܢܘܬܗ، ܢܩܘܦܬܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ، ܦܠܚܐ ܒܐܡܝܢܘܬܐ ܠܬܡܡܬܐ ܕܛܘܝܒ̈ܐ ܠܫܪܝܬܐ ܕܥܒܘܕܘ̈ܬܐ ܕ( ܫܒܘܥܐ ܡܪܕܘܬܢܝܐ ܣܘܪܝܝܐ 2022)، ܒܫܘܬܦܝ̈ܬܐ ܪ̈ܘܝܚܐ ܘܐܕܫܝ̈ܐ ، ܡܢ ܓܘܝ̈ܐ ܕܐܬܪܐ ܘܒܪܝܗ، ܡܥܒܪܝ ܥܠ ܐܕܫܢܝܘܬܐ ܘܥܬܝܪܘܬܐ ܡܪܕܘܬܢܝܬܐ ܘܝܪܬܘܬܢܝܬܐ ܘܐܡܢܝܬܐ ܦܪܝܫܬܐ ، ܒܣܡ ܓܘܗܿ ܥܡܢ. ܘܒܚܕܐ ܓܠܚܬܐ ܦܪܝܫܬܐ ܠܫܘܦܢ، ܡܘܝܕܥܠܗ “ܓ̰ܪܓ̰ܝܣ” ܕܥܒܘܕܘ̈ܬܐ ܕ( ܫܒܘܥܐ ܡܪܕܘܬܢܝܐ ܣܘܪܝܝܝܐ 2022) ܒܕ ܡܫܪܝ ܒܫܥܬܐ ܕܬܠܬ ܒܪܡܫܐ ܕܝܘܡ ܚܡܫܒܫܒܐ 8 ܟܢܘܢ ܩܕܡܝܐ 2022، ܓܘ ܐܘܢܐ ܕ(ܡܚܡܕ ܥܐܪܦ ܓ̰ܙܝܪܝ) ܒܕܗܘܟ ܓܘ ܙܘܝܚܐ ܚܒܫ ܡܢܝܢܐ ܡܢ ܟܫܝܪ̈ܘܬܐ ܐܡܢܝ̈ܐ ܘܡܪ̈ܕܘܬܢܝܐ، ܡܢ ܠܘܚ̈ܐ ܐܡܢܝ̈ܐ ܪ̈ܩܕܐ ܕܝܗܠܐ ܕܒܪܡܝܐ ܡܢ ܒܝܬ ܙܐܠܝܢ / ܩܡܫܠܝ ܒܣܘܪܝܐ ܘܢܩܫܬܐ ܕܐܘܪܟܣܬܪܐ ( ܝܗܠܐ) ܕܟܢܪܐ ܡܢ ܒܓܕܝܕܐ، ܐܪܫܟܝܬܐ ܕܡܪܕܘܬܐ ܣܘܪܝܝܬܐ، ܘܥܡ ܡܫܘܚܝ̈ܬܐ ܡܚܪ̈ܝܐ ܕܡܚܘܪ̈ܐ ܘܡܚܘܪ̈ܝܬܐ ܕܥܡܢ ܡܢ ܩܘܪ̈ܝܗ ܘܦܢܝ̈ܬܗ ܡܫܚܠܦ̈ܐ ܘܢܩܫܬܐ ܕܡܘܣܝܩܝ ܘܓܠܚܬܐ ܕܙܘܠܐ(ܦܝܠܡܐ) ܟܪܝܐ ܚܕܪ ܢܘܗܕܪܐ. ܘܥܡ ܛܘܟܣܐ ܕܚܕܐ ܝܬܒܬܐ ܕܘܪܫܝܬܐ ܚܕܪ ( ܩܐܡ ܕܙܡܝܪܬܐ ܣܘܪܝܝܬܐ) ܒܫܘܬܦܬܐ ܕ(“ܫܠܝܡܘܢ ܒܝܬ ܫܡܘܐܝܠ”، “ܢܝܢܒ ܠܐܡܣܘ”، “ܝܘܣܦ ܥܙܝܙ”) ، ܒܬܓܒܪܬܐ ܕ: “ܠܝܬ ܒܢܝܡܝܢ”. ܘܪܡܙܠܗ “ܓ̰ܪܓ̰ܝܣ” ܠܥܒܘܕܘ̈ܬܐ ܕܫܒܘܥܐ ܡܪܕܘܬܢܝܐ ܣܘܪܝܝܐ ܐܢܝ ܒܕ ܡܓܪܫܝ ܠܡܬܚܐ ܡܢ (8-12) ܟܢܘܢ ܩܕܡܝܐ 2022 ܓܘ ܕܗܘܟ، ܐܠܩܘܫ ، ܬܠܣܩܘܦ ܘܙܟܼܘܿ، ܚܒܫܝ ܡܢܝܢܐ ܡܢ ܟܫܝܪ̈ܘܬܐ ܡܪ̈ܕܘܬܢܝܐ ܘܒܬܝ̈ ܓܠܚ̈ܐ ܐܡܢܝ̈ܐ ܘܝܬܒܝ̈ܬܐ ܕܘܪ̈ܫܝܐ ، ܓܘ ܐܠܩܘܫ ܐܝܬ ܝܬܒܬܐ ܕܘܪܫܝܬܐ ܚܕܪ ( ܝܪܬܘܬܐ ܣܦܬܢܝܬܐ) ܒܫܘܬܦܬܐ ܕ( “ܡܝܟܐܝܠ ܒܢܝܡܝܢ” ، ” ܠܛܝܦ ܦܘܠܐ” ܘ”ܒܗܢܡ ܫܡܢܝ”) ، ܒܬܓܒܪܬܐ ܕ”ܐܡܝܪ ܦܘܠܘܣ ܥܟܘ” . ܘܓܘ ܬܠܣܩܘܦ ܝܬܒܬܐ ܕܘܪܫܝܬܐ ܒܫܡܐ ( ܬܫܥܝܬܢ) : ܒܫܘܬܦܬܐ ܕ(ܡ.ܕ.”ܥܐܡܪ ܐܠܓ̰ܡܝܠܝ”، “ܪܐܟܐܢ ܦܪܓ̰ ܥܐܙܪ)، ܒܬܓܒܪܬܐ ܕ” ܒܪܢܪܕ ܝܘܣܦ”. ܘܡܘܙܝܕܠܗ ܒܐ̄ܡܪܐ، ܒܕ ܚܙܚ ܒܐܠܩܘܫ، ܥܡ ܟܫܝܪ̈ܘܬܐ ܐ̄ܚܪ̈ܢܐ، ܓܠܚܬܐ ܕܡܛܐܠܬܐ ܒܫܡܐ ( ܬܪܝ ܫܓܘܿܫ̈ܐ – المشاغبان ) ، ܡܦܩܢܘܬܐ : (ܒܐܣܠ ܫܐܡܝܐ). ܘܐܦ ܗܕܟ ܦܪܫܠܢ ܚܕ ܝܘܡܐ ܝܪܬܘܬܢܝܐ ܓܘ ܐܠܩܘܫ، ܡܢ ܥܒܘܕܘ̈ܬܐ ܕܥܕܥܐܕܐ، ܚܒܫ ܠܘܚ̈ܐ ܐܡܢܝ̈ܐ ܪ̈ܩܕܐ ܘܥܒܘܕܘ̈ܬܐ ܠܫܒܪ̈ܐ ܘܓܠܚܬܐ ܕܚܙܘܐ ܕܪܡܝܐ ܒܫܡܐ : ( ܚܡܬܐ ܘܟܠܬܐ- الحماة والكنة)، ܡܦܩܢܘܬܐ “ܪܐܐܕ ܓ̰ܓ̰ܘ” ، ܥܡ ܡܩܪܒܬܐ ܓܠܚܬܐ ܕܠܒܘܫ̈ܐ ܦܠܟܠܘܪ̈ܝܐ ܕܦܢܝ̈ܬܐ ܕܥܡܢ ܘܒܕ ܚܬܡܚ ܝܘܡܐ ܝܪܬܘܢܝܐ ܒܫܗܪܬܐ ( ܙܡܝܪܬܐܝܪܬܘܬܢܝܬܐ) ܥܡ ܡܢܝܢܐ ܡܢ ܐܡܢ̈ܐ ܕܥܡܢ : “ܕܐܢܝ ܐܣܡܪܘ”، “ܢܝܢܘܣ ܐܕܘܪ” ، ” ܡܐܪܬܢ ܗܘܪܡܙ”، ܘܟܠ ܗܢܐ ܝܠܗ ܥܡ ܦܘܬܚܐ ܕܒܬܝ̈ ܓܠܚ̈ܐ ܕܐܡܢܐ ܣܘܟܡܝܐ ܘܦܘܠܚܢ̈ܐ ܕܐܝܕܐ ܘܝܪ̈ܬܘܬܐ ܘܥܡ ܡܐܟܠ̈ܐ ܥܡܡܝ̈ܐ ܘܠܚܡܐ ܒܟܠ ܐܕܫܗ. ܘܐ̄ܡܪܗ ܡܕܒܪܢܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܕܗܘܟ ܕܥܒܘܕܘ̈ܬܐ ܕܫܒܘܥܐ ܡܪܕܘܬܢܝܐ ܚܙܐܠܗܘܢ ܛܘܘܪܐ ܐܕܫܝܐ ܡܢ ܓܢ̄ܒ ܛܘܟܣܐ ܕܥܒܘܕܘܬܐ ܡܫܚܠܦ̈ܐ ܘܐܢܢܩܝ̈ܐ ܓܘ ܫܘܦ̈ܐ ܠܓܗܐ ܩܕܡܝܬܐ، ܐܝܟ ܬܠܣܩܘܦ ܘܙܟܼܘܿ ، ܐܢܝ ܒܕ ܚܙܝ ܡܢܝܢܐ ܡܢ ܥܒܘܕܘ̈ܬܐ ܐܝܟ ܡܫܘܚܝ̈ܬܐ ܡܚܪ̈ܝܐ ܘܢܩܫܬܐ ܘܙܡܪܐ ܘܒܬܝ̈ ܓܠܚ̈ܐ ܐܡܢܝ̈ܐ ܡܫܚܠܦ̈ܐ. ܘܦܝܫ ܕܟܝܪܐ ܕܥܒܘܕܘ̈ܬܐ ܕܫܒܘܥܐ ܡܪܕܘܬܢܝܐ ܚܒܫܝ ܥܡ ܦܘܬܚܬܐ ܕܡܢܝܢܐ ܡܢ ܒܬܝ̈ ܓܠܚ̈ܐ ܐܡܢܝ̈ܐ ܣܘܟܡܝ̈ܐ ܘܒܬܝ̈ ܓܠܚ̈ܐ ܕܦܘܠܚܢ̈ܐ ܕܐܝܕܐ، ܒܝܬ ܓܠܚܐ ܕܟܬܒܐ ܡܛܟܣܠܗ ܒܝܬ ܐܪ̈ܟܐ ܕܡܪܕܘܬܐ ܣܘܪܝܝܬܐ ܢܩܘܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܒܕ ܡܫܢܐ ܥܡ ܫܢܝܬܐ ܠܩܘܪ̈ܝܐ ܘܦܢܝ̈ܬܐ ܕܥܡܢ.
ܨܦܪܐ ܫܪܝܬܐ ܕܫܒܘܥܐ ܡܪܕܬܢܝܐ ܣܘܪܝܝܐ 2022….. ܐܕܫܢܝܘܬܐ ܘܥܬܝܪܘܬܐ ܡܪܕܘܬܢܝܬܐ ܘܝܪܬܘܬܢܝܬܐ
