ܒܬܪ ܟܠܝܬܐ ܡܘܓܪܫܠܗܿ ܙܘܕܐ ܡܢ ܥܣܪ ܫܢ̈ܐ، ܕܥܪܗܿ ܡܓܠܬܐ ܕ(ܒܢܐܦܠ) ܐܩܡܝܬܐ ܠܢܘܦܩܐ ܒܚܕ ܡܢܝܢܐ ܚܕܬܐ ܒܪܩܡܐ ( 46) ܕܦܝܫܐ ܐܡܝܢܝܬܐ ܓܘ ܚܦܩܬܐ ܕܡܫܡܠܝܢܐ ܪܢܝܝܐ ܘܣܦܪܝܐ ܕܒܨܘܝ̈ܐ ܘܐܟܕܝܡܝܝ̈ܐ ܘܝܨܘܦ̈ܐ ܒܨܒܘܬܐ ܡܪܕܘܬܢܝܬܐ ܒܐܣܟܝܡܐ ܓܘܢܝܐ ، ܘܨܒܘܬܐ ܡܪܕܘܬܢܝܬܐ ܣܘܪܝܝܬܐ ܒܐܣܟܝܡܐ ܕܝܠܢܝܐ ، ܓܘ ܚܘܦܛܐ ܕܣܝܥܬܐ ܕܣܝܘܡܘܬܐ ܕܡܓܠܬܐ ܠܐܡܝܢܘܬܐ ܕܡܬܦܥܠܢܘܬܐ ܥܡ ܟܬܘܒ̈ܐ ܘܫܪܝܪܘܬܐ ܕܐܣܘܪ̈ܐ ܕܠܚܘܡܝܐ ܡܪܕܘܬܢܝܐ ܘܪܢܝܝܐ ܘܕܝܕܥܬܢܝܐ.
ܘܒܥܕܢܐ ܕܚܙܐܠܗ ܡܢܝܢܐ ܚܕܬܐ ܡܢ ܡܓܠܬܐ ܢܘܗܪܐ ܕܢܘܦܩܐ، ܐ̄ܬܝܠܗܘܢ ܡܢܝܢܐ ܪܒܐ ܡܢ ܐܓܪ̈ܬܐ ܕܒܪܟܬܐ ܘܚܩܪܬܐ ܒܝܕ ܡܬܕܝܠܢܝ̈ܐ ܘܝܨܘܦ̈ܐ ܒܚܩܠܐ ܡܪܕܘܬܢܝܐ، ܦܪ̈ܨܘܦܐ ܘܫܘܬܐܣ̈ܐ، ܓܘ ܦܬܘܬܝ̈ܗܝ ܪ̈ܘܫܡܝܐ ܒܫܘܦ̈ܐ ܕܐܡܝܢܘܬܐ ܟܢܘܫܝܝܬܐ، ܘܡܘܥܒܪܝܗܝ ܥܠ ܐܝܩܪܝܗܝ ܒܗܢܐ ܡܫܡܠܝܢܐ ܦܪܝܫܐ ، ܘܚܝܪܬܝܗܝ ܠܚܕ ܡܫܩܠܐ ܙܗܝܐ ܐܬܝܢܐ، ܘܟܡ ܫܡܗܝܠܗ ܒܡܫܩܠܐ ܩܘܠܢܐ ܘܡܠܝܐ ܡܢ ܣܘܟܝ̈ܐ ܐܢܝ ܕܦܝܫܝ ܡܬܘܡܡܐ ܓܘ ܚܘܦܛܐ ܐܡܝܢܝܐ ܠܥܒܪܬܐ ܕܣܩܘܒܠܝ̈ܘܬܐ.
ܘܦܪܣܠܗ ܘܙܝܪܐ ܕܡܪܕܘܬܐ ܘܥܠܝܡ̈ܐ ܓܘ ܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܡܠܦܢܐ ” ܚܡܝ ܚܡܐ ܣܥܝܕ” ܗܘܢܝܐ ܦܪܝܫܐ ܒܗܢܐ ܦܘܪܣܐ. ܘܐܦ ܗܕܟ ܒܘܪܟܠܗ ܣܦܪܐ ܘܟܬܘܒܐ ܡܠܦܢܐ “ܦܛܪܘܣ ܢܒܬܝ” ܠܡܕܒܪܢܘܬܐ ܓܘܢܝܬܐ، ܟܕ ܟܬܒܠܗ ܦܬܓܼܡ̈ܐ ܕܐܝܩܪܐ ܘܠܘܒܒܐ ، ܘܐ̄ܡܪܗ : ” ܡܘܢܚܠܘܟܘܢ ܠܒܝ ܒܗܢ ܛܒܐ ܗܘ ܕܟܡ ܣܦܪܚܠܗ ܡܬܚܐ ܐܪܝܟܐ، ܦܝܫܠܗܿ ܡܘܟܠܝܬܐ (ܒܢܐܦܠ) ܡܢ ܢܘܦܩܐ ܐܠܨܐܝܬ ܒܐܝܟܢܘ̈ܬܐ ܩܫܝ̈ܐ ܘܫܒܘܩ ܡܢ ܢܘܣܝܝ̈ܢ ܐܢܐ ܘܡܫܢܝܐ ܕܟܬܘܪ “ܣܥܕܝܼ” ܠܢܘܦܩܗܿ ܐܠܐ ܥܡܠܝ̈ܢ ܦܝܫܝܗ̄ܘܘ ܫܦܝܠ̈ܐ ܘܠܐ ܩܒܝܠ̈ܐ ، ܐܕܝܘܡ ܒܡܕܥܪܬܘܟܘܢ (ܒܢܐܦܠ) ܠܢܘܦܩܐ ܝܠܗ ܚܕ ܣܗܡܐ ܡܢ ܡܗܝܡܢܘܬܐ ܠܡܫܢܝܐ ܡܘܪܕܢܐ ܪܒܐ “ܣܥܕܝـܼ ” ܘܠܟܠܝܗܝ ܐܢܝ ܕܦܠܚܠܗܘܢ ܓܘܗܿ ܡܢ ܢܘܦܩܗܿ ܘܗܠ ܐܕܝܘܡ̄” ، ܘܚܬܡܠܗ ܒܐ̄ܡܪܐ : ” ܦܨܚܘܬܢ ܪܒܬܐܝܠܗܿ ܒܢܘܦܩܗܿ ܘܥܡ ܩܘܒܠܛܝܒܘܬܐ ܪܒܬܐ ܘܐܝܩܪܐ”.
ܘܫܘܡܗܠܗ ܟܬܘܒܐ ܘܡܟܬܒܢܐ ܕܙܒܢܐ ܡܠܦܢܐ ܕܟܬܘܪ ” ܐܒܪܗܝܡ ܐܠܥܠܐܦܿ”، ܡܬܕܝܠܢܝܐ ܒܬܫܥܝܬܐ ܥܪܒܝܬܐ ܚܕܬܐ ܘܕܪܝܬܐ، ܢܘܦܩܐ ܕܡܢܝܢܐ ܚܕܬܐ ܡܢ ܡܓܠܬܐ ܕ(ܒܢܐܦܠ) ܒܬܪ ܟܠܝܬܐ ܕܡܬܚܐ ܕܙܘܕܐ ܡܢ ܥܣܪ ܫܢ̈ܐ ܕܐ̄ܬܝܠܗ ܕܬܡܡ ܡܐܙܠܬܐ ܕܡܓܠܬܐ ܒܟܪܬܐ ܓܘ ܦܘܪܫܢܗܿ ܘܒܪܘܩܘܬܗܿ. ܘܡܚܘܬܬܠܗ ܕܡܢܝܢܐ ܚܕܬܐ ܚܒܫܠܗ ܕܪ̈ܫܝܬܐ ܪ̈ܨܝܢܐ ܘܒܘܨܝ̈ܐ ܛܝܡܢ̈ܐ ܘܥܡ ܬܦܩܝ̈ܬܐ ܘܡܠܘܐ̈ܐ ܡܪ̈ܕܘܬܢܝܐ ܡܫܚܠܦ̈ܐ ܒܝܕ ܡܢܝܢܐ ܡܢ ܐܟܕܝܡܝܝ̈ܐ ܘܒܨܘܝ̈ܐ ܘܟܬܘܒ̈ܐ ܡܒܥܢ̈ܐ ، ܘܪܡܙܠܗ ܠܡܐܡܪܗ ܦܪܝܣܐ ܓܘܗܿ ܒܫܡܐ ܕ( ܠܟܣܝܩܘܢ ܕܣܝܘܡ̈ܐ ܣܘܪ̈ܝܝܐ ܠܡܠܦܢܐ “ܨܒܚ ܢܘܪܝـܼ ܐܠܡܪܙܘܟ”- معجم المؤلفين السريان للأستاذ الدكتور صباح نوري المرزوك).
ܘܡܘܩܪܒܠܗ ܡܠܦܢܐ ܕܟܬܘܪ ” ܥܡܪ ܐܠܓ̰ܡܝܠܝ” ( ܒܒܐ ܕܗܝܫܡ) ܡܠܦܢܐ ܒܟܠܢܝܘܬܐ ܕܥܬܩ̈ܐ / ܒܝܬ ܨܘܒܐ ܕܡܘܨܠ ، ܩܘܒܠܛܝܒܘܬܐ ܠܚܘܦܛ̈ܐ ܘܥܡܠ̈ܐ ܕܡܠܦܢܐ ” ܟܠܕܘ ܪܡܙܝـܼ ܐܘܓܼܢܐ” ( ܪܫ ܣܝܘܡܘܬܐ) ܘܡܝܩܪܬܐ “ܓ̰ܘܪܓ̰ܝܢܐ ܒܗܢܡ ܚܒܒܐ” ( ܢܛܪ ܐ̄ܪܙܐ ܕܣܝܘܡܘܬܐ) ܠܡܚܝܝܬܝܗܝ ܠܡܓܠܬܐ ܒܬܪ ܟܠܝܬܗܿ ܡܬܚܐ ܐܪܝܟܐ ܠܢܘܦܩܐ ܘܪܡܙܠܗ ܕܗܢ ܡܢܝܢܐ ܚܒܫܠܗ ܒܘܨܝܗ ܒܫܡܐ ܕ( ܚܫܚ̈ܬܐ ܘܢܩܫ̈ܐ ܟܬܝܒܝ̈ܐ ܣܘܪ̈ܝܝܐ ܘܥܪ̈ܒܝܐ ܥܠ ܦܬܘܬ̈ܐ ܕܒܬ̈ܐ ܝܘܪ̈ܬܢܝܐ ܡܫܝܚܝ̈ܐ ܡܘܨܠܝ̈ܐ- العبارات والنقوش الكتابية السريانية والعربية على واجهات البيوت التراثية المسيحية الموصلية ) .
ܘܐܦ ܗܕܟ ܡܙܘܝܚܠܗܿ ܦܬܐ ܪܘܫܡܝܬܐ ܕܡܚܘܪܐ ܣܘܪܝܝܐ ܪܒܐ “ܙܘܗܝܪ ܒܘܪܕܐ” ܒܚܕ ܠܦܦܐ ܗܘ ܕܟܡ ܦܪܫܐܠܗ ܡܓܠܬܐ ܒܕܟܪܐ ܕܡܫܢܝܐ ܘܡܫܡܠܝܢܗ ܡܒܥܢܐ ܟܕ ܟܬܒܠܗܿ ܓܘ ܦܪܣܬܗܿ : ” ܦܪܣܠܗܿ ܡܓܠܬܐ ܕ(ܒܢܐܦܠ) ܢܦܝܩܬܐ ܒܝܕ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܓܘ ܡܢܝܢܗܿ ܕ(46) ܠܦܦܐ ܕܝܠܢܝܐ ܚܕܪ ܡܫܢܝܐ ܘܥܡ ܓܕܫ̈ܐ ܕܒܘܝܐܐ ܗܘ ܕܩܝܡܠܗܿ ܒܓܘܗ ܡܕܒܪܢܘܬܐ ܓܘ ܥܢܟܒܐ ܠܡܚܘܪܐ ܥܝܪܩܝܐ ܣܘܪܝܝܐ ܪܒܐ ܡܫܢܝܐ ” ܙܘܗܝܪ ܒܗܢܡ ܒܘܪܕܐ” ܗܘ ܕܫܘܢܐܠܗ ܠܓܢܘܢܐ ܫܡܝܢܐ ܨܦܪܐ ܕ 26/ 4 / 2022 .
ܩܘܒܠܛܝܒܘܬܐ ܠܪܫ ܣܝܘܡܘܬܐ ܡܠܦܢܐ “ܟܠܕܘ ܪܡܙܝ ܐܘܓܼܢܐ” .
ܩܘܒܠܛܝܒܘܬܐ ܠܢܛܪ ܐ̄ܪܙܐ ܕܣܝܘܡܘܬܐ ܡܠܦܢܝܬܐ “ܓ̰ܘܪܓ̰ܝܼܢܐ ܒܗܢܡ ܚܒܒܐ” ، ܩܘܒܠܛܝܒܘܬܐ ܠܟܕܝܪܐ ܕܡܓܠܬܐ ܡܫܡܗܬܐ…… ܒܝܬܘܬܐ ܕܡܫܢܝܐ.”
ܘܥܡ ܢܘܗܪ̈ܐ ܡܠܝ̈ܐ ܡܢ ܚܘܒܐ ܘܐܝܩܪܐ ܦܪ̈ܝܣܐ ܒܝܕ ܡܢܝܢܐ ܡܢ ܟܬܘܒܼ̈ܐ ܘܐܟܕܝܡܝܝ̈ܐ ܘܢܩܘܦ̈ܐ ܠܥܒܘܕܘ̈ܬܐ ܕܡܕܒܪܢܘܬܐ.
ܡܩܪܒܐ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܦܪܨܘܦܐ ܕܡܕܒܪܢܗܿ ܓܘܢܝܐ “ܟܠܕܘ ܪܡܙܝ ܐܘܓܼܢܐ” ܘܣܝܥܬܐ ܕܣܝܘܡܘܬܐ ܕܡܓܠܬܐ ܕ(ܒܢܐܦܠ) ܘܟܠܝܗܝ ܦܠܚ̈ܐ ܒܡܕܒܪܢܘܬܐ، ܟܠܝܗܝ ܡܢ ܡܫܘܬܦܠܗ ܒܦܨܚܘܬܗܿ ܒܫܪܝܬܐ ܕܡܢܝܢܐ ܚܕܬܐ ܡܢ ܡܓܠܬܐ ܘܟܠܝܗܝ ܐܢܝ ܕܡܫܘܬܦܠܗܘܢ ܠܚܬܝܬܘܬܐ ܕܗܢܐ ܡܫܡܠܝܢܐ ، ܘܡܛܘܝܡܢܗܿ ܟܠܝܗܝ ܥܡܠ̈ܐ ܡܘܩܪܒܐ ܠܫܪܪܬܐ ܕܗܢܐ ܢܝܫܐ.
