ܒܛܘܝܒܐ ܪܘܫܡܝܐ… ܡܪܕܘܬܐ ܣܘܪܝܝܬܐ ܡܙܝܚܐ ܒܝܘܡܐ ܬܒܠܝܐ ܕܠܫܢܐ ܕܝܡܐ
ܡܛܘܟܣܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܒܨܦܪܐ ܕܝܘܡ ܫܒܬܐ 21 ܫܒܛ 2026، ܓܘ ܐܘܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܒܪܘܣܬܩܐ ܕܥܢܟܒܐ، ܥܒܘܕܘ̈ܬܐ ܕܝܘܡܐ ܙܘܝܚܝܐ ܕܝܠܢܝܐ ܒܦܘܪܣܐ ܕܝܘܡܐ ܬܒܠܝܐ ܕܠܫܢܐ ܕܝܡܐ.
ܘܫܘܪܐܠܗܘܢ ܥܒܘܕܘ̈ܬܐ ܕܙܘܝܚܐ، ܒܡܡܠܐ ܕܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܘܟܝܠܘܬܐ، ܘܡܡܠܐ ܕܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܗܘ ܕܫܘܪܪܠܗ ܓܘܗ ܥܠ ܐܢܢܩܝܘܬܐ ܕܠܫܢܐ ܕܝܡܐ ܘܓܪܐ ܕܐܝܬܠܗܿ ܘܙܝܪܘܬܐ ܕܡܪܕܘܬܐ ܘܥܠܝܡ̈ܐ ܒܠܫܢܐ ܣܘܪܝܝܐ ܒܐܘܪܚܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܡܕܒܪ̈ܢܘܬܐ ܘܫܘܬܐܣ̈ܐ ܢܩܝܦ̈ܐ ܐܠܗܿ.
ܒܬܪ ܗܕܟ ܦܝܫܠܗ ܓܠܝܚܐ ܦܝܠܡܐ ܟܪܝܐ ܥܠ ܠܫܢܐ ܕܣܘܪܬ ܒܝܕ ܡܦܩܢܐ (ܪܦܝܩ ܢܘܪܝ ܚܢܐ)، ܒܬܪ ܗܕܟ ܦܝܫܠܗ ܡܘܩܪܒܐ ܚܕ ܠܘܚܐ ܦܠܟܠܘܪܝܐ ܪܩܕܝܐ ܒܝܕ ܝܗܠܐ ܣܘܪܝܝܐ ܕܐܡܢ̈ܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ.
ܘܦܝܫܠܗܘܢ ܡܛܝܒܐ ܠܙܘܝܚܐ، ܗܕܡܐ ܕܡܘܬܒܐ ܕܩܝܘܡ̈ܐ ܥܝܪܩܝܐ ܡܝܩܪܐ (ܟܠܕܘ ܪܡܙܝ ܐܘܓܼܢܐ)، ܘܗܕܡܐ ܕܦܪܠܡܢ ܕܩܠܝܡܐ ܕܟܘܪܕܣܬܢ ܡܝܩܪܐ (ܓ̰ܝܡܣ ܗܣܕܘ)، ܘܘܙܝܪܐ ܕܩܠܝܡܐ ܕܨܒܼ̈ܘܬܐ ܕܡܟܝܢ̈ܬܐ ܡܝܩܪܐ (ܐܝܕܢ ܡܥܪܘܦ)، ܘܘܙܝܪܐ ܕܡܘܒܠܢܘܬܐ ܘܛܘܦܝ̈ܐ ܒܫܘܠܛܢܘܬܐ ܕܩܠܝܡܐ ܡܝܩܪܐ (ܐܢܘ ܓ̰ܘܗܪ ܥܒܕܘܟܐ)، ܘܗܘܦܪܟܐ ܕܐܪܒܝܠ ܡܝܩܪܐ (ܐܘܡܝܕ ܚܘܫܢܘ)، ܘܘܟܝܠܐ ܕܘܙܝܪܘܬܐ ܕܡܪܕܘܬܐ ܒܫܘܠܛܢܘܬܐ ܕܩܠܝܡܐ ܡܝܩܪܐ (ܐܪܝܐܢ ܨܠܐܚ ܐܠܕܝܢ)، ܘܡܠܘܟܐ ܕܘܙܝܪܘܬܐ ܕܡܪܕܘܬܐ ܘܥܠܝܡ̈ܐ ܘܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܘܟܝܠܘܬܐ ܡܝܩܪܐ (ܦܪܗܢܓ ܓܦܘܪ)، ܘܡܝܩܪܐ (ܗܝܡܢ ܩܐܕܪ) ܩܝܡܩܡܐ ܕܪܘܣܬܩܐ ܕܥܢܟܒܐ ܒܘܟܝܠܘܬܐ ܥܡ ܟܢܫܐ ܡܢ ܐܟܕܝܡܝ̈ܐ ܘܡܘܪ̈ܕܢܐ ܒܡܪܕܘܬܐ ܘܠܫܢܐ ܣܘܪܝܝܐ.
ܘܦܝܫ ܕܟܝܪܐ، ܕܝܘܡܐ ܬܒܠܝܐ ܕܠܫܢܐ ܕܝܡܐ (International Mother Language Day) ܝܠܗ ܙܘܝܚܐ ܫܢ̄ܬܢܝܐ ܒܟܠ ܦܢܝ̈ܬܐ ܕܥܠܡܐ ܠܚܝܠܢܬܐ ܕܥܝܪܘܬܐ ܒܐܕܫܢܝܘܬܐ ܠܫܢܝܬܐ ܘܡܪܕܘܬܢܝܬܐ ܘܣܓܝܐܘܬܐ ܕܠܫܢ̈ܐ، ܘܦܝܫܠܗ ܡܚܘܫܒܢܐ ܣܝܩܘܡ 21 ܫܒܛ ܝܘܡܐ ܬܒܝܠܝܐ ܕܠܫܢܐ ܕܝܡܐ، ܘܦܝܫܠܗ ܦܣܝܩܐ ܪܘܫܡܐܝܬ ܒܝܕ ܟܢܘܫܬܐ ܓܘܢܝܬܐ ܕܐܡܘ̈ܬܐ ܡܚܝܕ̈ܐ.
