ܐܡܝܢܝܐܝܠܗ ܥܕܥܐܕܐ ܕܝܪܬܘܬܐ ܣܘܪܝܝܬܐ ܒܕܘܪܬܗ ܪܒܝܥܝܬܐ، ܒܥܒܘܕܘ̈ܬܗ ܝܪ̈ܬܘܬܢܝܐ، ܦܠܟܠܘܪ̈ܝܐ ܘܙܡܝܪ̈ܝܐ ܒܝܘܡܐ ܬܪܝܢܐ ܢܩܝܦܐܝܬ ܒܛܘܝܒܐ ܕܟܢܫܐ ܪܒܐ، ܘܗܘ ܡܛܟܣܐܠܗ ܡܕܒܪܢܘܬܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܢܩܝܦܬܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܒܫܘܦܗ ܥܝܕܝܐ ܒܪܩܘܒܠ ܬܠܐ ܕܩܨܪܐ ܥܬܩܝܐ ܒܠܒܐ ܕܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ.
ܘܫܘܪܐܠܗ ܝܘܡܐ ܬܪܝܢܐ ܢܘܩܙ̈ܗ ܒܥܒܘܕܘ̈ܬܐ ܕܡܕܪ̈ܫܝܬܐ ܣܘܪ̈ܝܝܐ ܐܢܝ ܕܫܘܬܦܠܗܘܢ ܒܥܕܥܐܕܐ ܒܢܝܫܐ ܕܠܒܝܒܘܬܝܗܝ ܠܐܡܝܢܘܬܐ ܥܡ ܥܩܪ̈ܝܗܝ ܘܫܘܬܦܬܐ ܒܢܛܪܬܐ ܕܝܪܬܘܬܝܗܝ، ܒܬܪ ܗܕܟ ܦܝܫܠܗ ܡܘܩܪܒܐ ܚܕ ܠܘܚܐ ܦܠܟܠܘܪܝܐ ܙܡܝܪܝܐ ܒܝܕ ܝܗܠܐ ܕܒܪܡܝܐ ܐܬܝܢܐ ܡܢ ܡܕܝܢ̄ܬܐ ܕܩܡܫܠܝ /ܣܘܪܝܼܐ.
ܘܡܫܘܬܦܠܗ ܒܝܘܡܐ ܬܪܝܢܐ ܡܢ ܥܕܥܐܕܐ ܝܗܠܐ ܕ( ܙܝܘܣ) ܡܢ ܒܓܼܕܝܕܐ ܠܓܗܐ ܩܕܡܝܬܐ ܒܚܕ ܐܘܦܪܝܬ ܚܕܪ ܡܪܕܘܬܐ ܣܘܪܝܝܬܐ ܒܫܡܐ ܕ(ܡܠܚܐ)، ܘܥܡ ܓܠܚ̈ܐ ܦܠܟܠܘܪ̈ܝܐ ܙܡܝܪ̈ܝܐ ܕܦܝܫܠܗܘܢ ܡܘܩܪܒܐ ܒܝܕ ܝܗܠܐ ܕ(ܣܪܓܘܢ) ܕܪܩܕܐ ܦܠܟܠܘܪܝܐ ܐܬܝܢܐ ܡܢ ܐܪܫܟܝܬܐ ܐܪܡܝܢܝܬܐ ܒܪܝܦܐܢ ܘܝܗܠܐ ܣܘܪܝܝܐ ܕܐܡܢ̈ܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ.
ܘܚܒܫܠܗ ܝܘܡܐ ܬܪܝܢܐ ܡܢ ܥܕܥܐܕܐ ܡܩܪܒܬܐ ܕܡܢܝܢܐ ܡܢ ܙܡܝܪ̈ܬܐ ܡܫܘܬܦܠܗܘܢ ܓܘܝܗܝ ܡܢܝܢܐ ܡܢ ܐܡܢ̈ܐ ܕܥܡܢ ( ܐܫܘܪ ܠܥ̄ܙܪ، ܡܝܪܢܐ ܐܝܫܘ، ܢܝܢܘܣ ܐܕܘܪ، ܓܓܝ، ܢܓܼܡ ܐܕܘܪ، ܓ̰ܘܙܝܦܿ ܐܝܘܐܣ) ، ܐܢܝ ܕܡܘܓܪܫܠܗܘܢ ܗܠ ܫܥܬܐ ܕ(9:30) ܒܪܡܫܐ.
ܘܦܝܫܠܗܘܢ ܡܛܝܒ̈ܐ ܠܥܒܘܕܘ̈ܬܐ ܕܝܘܡܐ ܬܪܝܢܐ ܡܢ ܥܕܥܐܕܐ ܪܥܝܐ ܕܡܪܥܝܬܐ ܕܚܕܝܒ ܕܣܘܪ̈ܝܝܐ ܩܬܘܠܝܩ̈ܐ ܓܘ ܐܪܒܝܠ ܡܝܛܪܦܘܠܝܛܐ ܡܪܝ “ܢܬܢܐܝܠ ܢܙܐܪ ܥܓ̰ܡ” ، ܘܘܙܝܪܐ ܕܨܒܘ̈ܬܐ ܕܡܟܝܢ̈ܬܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ “ܐܝܕܢ ܡܥܪܘܦܿ”.
ܘܦܝܫ ܕܟܝܪܐ، ܕܡܕܒܪܢܘܬܐ ܓܘܢܝܬܐ ܕܡܕܪܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܝܠܗܿ ܐܡܝܢܝܬܐ ܒܛܘܟܣܐ ܕܥܕܥܐܕܐ ܕܝܪܬܘܬܐ ܣܘܪܝܝܬܐ ܒܢܝܣܢ ܡܢ ܟܠ ܫܢ̄ܬܐ، ܦܝܫ ܥܒܝܕܐ ܓܘܗ ܥܒܘܕܘ̈ܬܐ ܝܪ̈ܬܘܬܢܝܐ ܘܥܡܡܝ̈ܐ ܡܫܚܠܦ̈ܐ، ܘܦܝܫ ܥܒܝܕܐ ܗܕ ܫܢ̄ܬܐ ܒܡܬܚܐ ܡܢ ( 4-6) ܢܝܣܢ 2024.
