ܫܘܪܐܠܗܘܢ ، ܒܪܡܫܐ ܕܚܡܫܒܫܒܐ 4 ܢܝܣܢ 2024، ܥܒܘܕܘ̈ܬܐ ܕܥܕܥܐܕܐ ܕܝܪܬܘܬܐ ܣܘܪܝܝܬܐ ܒܕܘܪܬܗ ܪܒܝܥܝܬܐ، ܗܘ ܕܟܡ ܛܟܣܐܠܗ ܡܕܒܪܢܘܬܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܢܩܝܦܬܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܒܫܘܦܗ ܥܝܕܝܐ ܒܪܩܘܒܠ ܬܠܐ ܕܩܨܪܐ ܥܬܩܝܐ ܒܠܒܐ ܕܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ.
ܘܦܝܫܠܗܘܢ ܡܛܝܒܐ ܠܚܘܪ̈ܩܢܐ ܕܦܘܬܚܐ ܦܛܪܝܪܟܐ ܕܥܕܬܐ ܟܠܕܝܬܐ ܟܪܕܝܢܠܐ ܡܪܝ “ܠܘܝܣ ܪܘܦܐܝܠ ܣܟܘ”، ܘܪܫܐ ܕܐܦܣܩܘܦ̈ܐ ܕܡܪܥܝܬܐ ܕܡܘܨܠ ܘܟܪܟܘܟ ܘܟܘܪܕܣܬܢ ܕܣܘܪ̈ܝܝܐ ܐܪ̈ܬܕܘܟܣܝܐ ܡܪܝ “ܢܝܩܘܕܝܡܘܣ ܕܘܝܕ ܡܬܝ ܫܪܦܿ”، ܘܪܫܐ ܕܐܦܣܩܘܦ̈ܐ ܕܡܪܥܝܬܐ ܕܐܘܪܡܝ ܕܥܕܬܐ ܟܠܕܝܬܐ ܡܪܝ “ܬܐܘܡܣ ܡܝܪܡ”، ܘܐܒܐ “ܡܐܪܬܢ” ܡܛܦܣܢܐ ܕܦܛܪܝܪܟܐ ܕܥܕܬܐ ܕܡܕܢܚܐ ܐܬܘܪܝܬܐ ܡܪܝ “ܐܒܐ ܪܘܐܝܠ ܬܠܝܬܝܐ”، ܘܒܪܘܢܐ ܕܪܫܐ ܒܐܪܙܢܝ ܡܝܩܪܐ” ܡܠܐ ܡܘܨܛܦܐ ܒܐܪܙܢܝ”، ܘܘܙܝܪܐ ܕܡܘܒܠܢܘܬܐ ܘܛܘܦܝ̈ܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ “ܐܢܘ ܓ̰ܘܗܪ ܥܒܕܘܟܐ”، ܘܘܟܝܠܐ ܕܘܙܝܪ ܡܪܕܘܬܐ ܘܥܠܝܡ̈ܐ “ܐܪܝܐܢ ܨܠܚ ܐܠܕܝܢ”، ܘܪܫܐ ܕܡܟܬܒܐ ܕܐܣܘܪ̈ܐ ܒܪ̈ܝܐ ܒܫܘܠܛܢܘܬܐ ܕܩܠܝܡܐ “ܣܦܝܢ ܕܙܝܝ”، ܘܗܘܦܪܟܐ ܕܐܪܒܝܠ “ܐܘܡܝܕ ܚܘܫܢܘ”، ܘܥܡ ܡܢܝܢܐ ܡܢ ܡܫܬܐܠܢ̈ܐ ܕܘܟܬܢܝ̈ܐ ܒܪܘܣܬܩܐ ܕܥܢܟܒܐ ܘܟܢܫܐ ܪܒܐ ܡܢ ܒܢܝ̈ ܦܢܝܬܐ.
ܘܫܘܪܐܠܗ ܥܕܥܐܕܐ ܥܒܘܕܘ̈ܬܗ ܒܚܕܐ ܡܐܙܠܬܐ ܫܘܪܐܠܗܿ ܡܢ ܬܪܝܢܝܬܐ ܕܥܢܟܒܐ ܛܘܦܣܢܝܬܐ ( ܒܗܪܕܐܪܐܢ) ܘܡܛܝܬܐ ܗܠ ܫܘܦܐ ܕܥܕܥܐܕܐ، ܒܚܕܐ ܡܫܪܝܬܐ ܝܩܝܪܬܐ ܘܒܩܘܕܡܗܿ ܒܕܘܩܐ ܕܟܠܘ ܕܡܪ̈ܥܝܬܐ ܣܘܪܝܝܐ ܒܬܪ ܗܕܟ ܡܪܟܒܐ ܡܠܟܝܐ ܕܐܠܗܬܐ ܥܫܬܪ ܪܡܙܐ ܕܚܘܒܐ ܘܫܘܦܪܐ ܗܝ ܕܟܡ ܛܦܣܐܠܗܿ ܡܠܟܬܐ ܕܫܘܦܪܐ ܕܥܝܪܩ ܡܝܩܪܬܐ “ܡܐܪܝܐ ܦܪܗܐܕ” ܒܚܕ ܚܙܘܐ ܕܡܐ ܠܡܫܪܝܬܐ ܕܙܘܝܚ̈ܐ ܬܘܕܝܬܢܝ̈ܐ ܓܘ ܒܒܠ .
ܘܒܬܪ ܡܛܝܬܐ ܠܫܘܦܐ ܕܥܕܥܐܕܐ، ܩܝܨܠܗ ܫܪܝܛܐ ܕܦܘܬܚܐ ܟܪܕܝܢܠܐ ܡܪܝ “ܠܘܝܣ ܣܐܟܘ” ܘܡܝܛܪܦܘܠܝܛܐ ܡܪܝ “ܢܝܩܘܕܝܡܘܣ ܕܘܝܕ ܡܬܝ ܫܪܦܿ” ܘܡܝܩܪܐ “ܡܠܐ ܡܘܨܛܦܐ ܡܣܥܘܕ ܒܐܪܙܢܝ”، ܕܡܘܝܕܥܠܗܘܢ ܒܫܪܝܬܐ ܕܥܒܘܕܘ̈ܬܐ ܕܥܕܥܐܕܐ ܗܘ ܒܕ ܡܓܪܫ ܡܬܚܐ ܕܬܠܬܐ ܝܘܡ̈ܐ ܢܩܝܦ̈ܐ.
ܒܬܪ ܗܕܟ ܡܘܩܪܒܠܗ ܟܪܕܝܢܠܐ “ܣܐܟܘ” ܚܕ ܡܡܠܐ ܒܗܢ ܦܘܪܣܐ، ܡܘܩܪܒܠܗ ܓܘܗ ܩܘܒܠܛܝܒܘܬܗ ܠܟܠܝܗܝ ܦܠܚ̈ܐ ܥܠ ܛܘܟܣܐ ܘܥܒܕܬܐ ܕܗܢ ܥܕܥܐܕܐ ܥܡܡܝܐ ܪܒܐ ܗܘ ܡܛܦܣ ܫܪܫܐ ܕܡܕܝܢܝܘܬܐ ܕܥܡܢ ܓܘ ܥܝܪܩ ܘܦܢܝܬܐ، ܘܪܡܙܠܗ ܐܦ ܗܕܟ ܠܪܘܚܐ ܕܚܝܝܬܐ ܫܝܢܝܬܐ ܗܘ ܕܦܪܫ ܓܘܗܿ ܩܠܝܡܐ ܕܟܘܪܕܣܬܢ، ܗܘ ܡܢܕܝ ܕܫܒܩܠܗ ܣܗܡܐ ܪܒܐ ܡܢ ܡܫܝܚܝ̈ܐ ܕܚܝܝ ܒܢܝܚܘܬܐ ܓܘܗ.
ܒܬܪ ܗܕܟ ܡܘܩܪܒܠܗ ܘܙܝܪܐ ܕܡܘܒܠܢܘܬܐ ܘܛܘܦܝ̈ܐ ܡܡܠܐ ܕܫܘܠܛܢܘܬܐ ܕܩܠܝܡܐ، ܫܘܪܪܠܗ ܓܘܗ ܥܠ ܣܢܕܬܐ ܐܡܝܢܝܬܐ ܒܝܕ ܫܘܠܛܢܘܬܐ ܩܐܡܝܬܐ ܠܡܟܝܢ̈ܬܐ ܬܘܕܝܬܢܝ̈ܐ ܘܐܘܡܬܢܝ̈ܐ ܐܢܝ ܕܚܝܝ ܒܩܠܝܡܐ، ܘܪܡܙܠܗ ܒܡܡܠܗ ܠܓܪܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܡܕܒܪܢܘܬܗܿ ܩܐܡܝܬܐ ܒܛܘܟܣܐ ܕܐܢܝ ܥܒܘܕܘ̈ܬܐ ܥܡܡܝ̈ܐ ܘܝܪ̈ܬܘܬܢܝܐ ܟܠ ܫܢ̄ܬܐ ܒܥܢܟܒܐ.
ܘܒܬܪ ܡܩܪܒܬܐ ܕܡܡܠ̈ܐ ܕܩܒܠܬܐ ܒܫܝܐ، ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܚܕ ܠܘܚܐ ܡܢ ܦܘܠܚܢ̈ܐ ܕܐܝܕܐ ܕܐܡܢܐ “ܐܠܢ ܒܝܬ ܫܡܘܐܝܠ” ܠܡܝܩܪܐ “ܡܠܐ ܡܘܨܛܦܐ ܡܣܥܘܕ ܒܐܪܙܢܝ”، ܘܒܬܪ ܗܕܟ ܡܩܪܒܬܐ ܕܐܘܦܪܝܬ ܒܫܡܐ ܕ( ܐܚܢܢ ܟܠܗ ܐܬܪܐ) ܡܢ ܡܡܠ̈ܐ ܕ”ܢܝܢܒ ܠܡܣܘ”، ܘܩܝܢ̈ܬܐ ܕ”ܢܒܝܠ ܝܘܣܦ”.
ܘܫܘܪܐܠܗܘܢ ܒܬܪ ܗܕܟ ܓܠܚ̈ܐ ܦܠܟܠܘܪ̈ܝܐ ܙܡܝܪ̈ܝܐ ܕܦܝܫܠܗܘܢ ܡܘܩܪܒܐ ܒܝܕ ܝܗܠ̈ܐ ܐܬܝܢ̈ܐ ܡܢ ܐܬܪ̈ܘܬܐ ܡܫܚܠܦ̈ܐ ܠܫܘܬܦܬܐ ܒܥܕܥܐܕܐ، ܘܦܪܝܫܐܝܬ ܝܗܠܐ ܕ( ܣܪܓܘܢ) ܕܪܩܕܐ ܦܠܟܠܘܪܝܐ ܗܘ ܕܫܘܬܦ ܠܓܗܐ ܩܕܡܝܬܐ ܡܢ ܐܪܫܟܝܬܐ ܐܪܡܝܢܝܬܐ ܒܪܝܦܐܢ، ܝܗܠܐ ܕ(ܒܐܪܡܝܐ) ܡܢ ܡܕܝܢ̄ܬܐ ܕܩܡܫܠܝ ܒܣܘܪܝܐ، ܘܥܡ ܝܗܠܐ ܣܘܪܝܝܐ ܕܐܡܢ̈ܐ ܢܩܝܦܐ ܠܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܕܥܝܪܩ.
ܘܚܒܫܠܗ ܙܘܝܚܐ، ܦܘܬܚܐ ܕܫܘܩܐ ܕܦܘܠܚܢ̈ܐ ܕܐܝܕܐ ܘܦܘܠܚܢ̈ܐ ܝܪ̈ܬܘܬܢܝܐ ܥܡܡܝ̈ܐ ܗܘ ܕܫܘܬܦܠܗ ܓܘܗ ܡܢܝܢܐ ܪܒܐ ܡܢ ܝܨܘܦ̈ܐ ܘܡܬܕܝܠܢܝ̈ܐ ܒܓܝܓܼܠܐ ܕܦܘܠܚܢ̈ܐ ܝܪ̈ܬܘܬܢܝܐ ܘܐܘܡܢܘ̈ܬܐ ܦܠܟܠܘܪ̈ܝܐ ܘܦܘܠܚܢ̈ܐ ܕܐܝܕܐ، ܘܥܡ ܕܐܝܬܘܬܐ ܕܒܝܬ ܩܗܘܬܐ ܝܪܬܘܬܢܝܐ ܘܒܝܬ ܒܘܫܠܐ ܝܪܬܘܬܢܝܐ ܐܣܝܪܐ ܒܒܝܬ ܢܚܬܘܡ̈ܐ ܝܪܬܘܬܢܝܐ، ܗܘ ܕܡܩܪܒܝ ܓܘܗ ܢܫ̈ܐ ܫܘܬܦܝ̈ܬܐ ܡܢܝܢܐ ܡܢ ܡܐܟ̈ܠܐ ܝܪ̈ܬܘܬܢܝܐ ܡܢ ܦܢܝ̈ܬܐ ܡܫܚܠܦ̈ܐ ܕܥܡܢ ܒܝܘܪܟܐ ܕܝܘܡ̈ܐ ܕܥܕܥܐܕܐ.
ܘܚܒܫܠܗ ܝܘܡܐ ܩܕܡܝܐ ܕܥܕܥܐܕܐ ܡܩܪܒܬܐ ܕܡܢܝܢܐ ܡܢ ܙܡܪ̈ܝܬܐ ܡܫܘܬܦܠܗܘܢ ܓܘܗ ܡܢܝܢܐ ܡܢ ܐܡܢ̈ܐ ܕܥܡܢ ( ܐܘܢܝܠ ܪܝܚܢܐ ، ܪܡܣܢ ܫܕܪܐܟ ، ܣܬܢܠܝ ܪܒܐܢ، ܣܐܟܘ ܣܐܟܐ، ܙܐܢܐ ܡܓ̰ܝܕ) ، ܐܢܝ ܕܡܘܓܪܫܠܗܘܢ ܗܠ ܫܥܬܐ ܕ(9:30) ܒܪܡܫܐ.
ܘܦܝܫ ܕܟܝܪܐ، ܕܡܕܒܪܢܘܬܐ ܓܘܢܝܬܐ ܕܡܕܪܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܝܠܗܿ ܐܡܝܢܝܬܐ ܒܛܘܟܣܐ ܕܥܕܥܐܕܐ ܕܝܪܬܘܬܐ ܣܘܪܝܝܬܐ ܒܢܝܣܢ ܡܢ ܟܠ ܫܢ̄ܬܐ، ܦܝܫ ܥܒܝܕܐ ܓܘܗ ܥܒܘܕܘ̈ܬܐ ܝܪ̈ܬܘܬܢܝܐ ܘܥܡܡܝ̈ܐ ܡܫܚܠܦ̈ܐ، ܘܦܝܫ ܥܒܝܕܐ ܗܕ ܫܢ̄ܬܐ ܒܡܬܚܐ ܡܢ ( 4-6) ܢܝܣܢ 2024.
