ܦܝܫܠܗܘܢ ܚܬܝܡܐ ، ܒܪܡܫܐ ܕܫܒܬܐ 6 ܢܝܣܢ 2024، ܥܒܘܕܘ̈ܬܐ ܕܥܕܥܐܕܐ ܕܝܪܬܘܬܐ ܣܘܪܝܝܬܐ ܒܕܘܪܬܗ ܪܒܝܥܝܬܐ ܒܢܨܝܚܘܬܐ ܪܒܬܐ ܒܛܘܝܒܐ ܟܢܫܝܐ ܦܪܝܫܐ، ܗܘ ܕܟܡ ܛܟܣܐܠܗ ܡܕܒܪܢܘܬܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܢܩܝܦܬܐ ܠܡܕܢܘܪܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ، ܒܫܘܦܗ ܥܝܕܝܐ ܒܪܩܘܒܠ ܬܠܐ ܕܩܨܪܐ ܥܬܩܝܐ ܒܠܒܐ ܕܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ.
ܘܫܘܪܐܠܗ ܝܘܡܐ ܐ̄ܚܪܝܐ ܥܒܘܕܘ̈ܬܗ ܒܐܘܦܪܝܬ ܙܡܝܪܝܐ ܒܫܡܐ ܕ( ܐܚܢܢ ܟܠܗ ܐܬܪܐ) ܡܢ ܡܡܠ̈ܐ ܕ”ܢܝܢܒ ܠܡܣܘ” ، ܘܩܝܢ̈ܬܐ ܕ”ܢܒܝܠ ܝܘܣܦ”، ܘܒܬܪ ܗܕܟ ܦܝܫܠܗܘܢ ܡܘܩܪܒܐ ܓܠܚ̈ܐ ܦܠܟܠܘܪ̈ܝܐ ܪ̈ܩܕܝܐ ܒܝܕ ܝܗܠܐ ܕ(ܣܪܓܘܢ) ܕܪܩܕܐ ܦܠܟܠܘܪܝܐ ܐܬܝܢܐ ܡܢ ܐܪܡܝܢܝܐ ܘܝܗܠܐ ܕ(ܒܪܡܝܐ) ܣܘܪܝܝܐ ܐܬܝܢܐ ܡܢ ܩܡܫܠܝ ܒܣܘܪܝܼܐ، ܘܥܡ ܝܗܠܐ ܣܘܪܝܝܐ ܕܐܡܢ̈ܐ ܢܩܝܦܐ ܠܡܕܢܘܪܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܕܥܝܪܩ.
ܘܚܒܫܠܗ ܝܘܡܐ ܬܠܝܬܝܐ ܡܢ ܥܕܥܐܕܐ ܡܢܝܢܐ ܡܢ ܡܡܠ̈ܐ، ܘܫܘܪܝܐ ܡܡܠܐ ܕܩܝܡܐ ܒܦܘܠܚܢ̈ܐ ܕܩܢܨܠܐ ܐܡܪܝܟܝܐ ܓܘܢܝܐ ܓܘ ܐܪܒܝܠ ܡܝܩܪܬܐ “ܒܐܡܝܠܐ ܗܐܟ”، ܩܘܠܣܠܗܿ ܓܘܗ ܒܓܪܐ ܕܡܕܢܘܪܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܥܒܕܬܐ ܕܐܝ ܥܕܥܐܕܐ، ܘܐܦ ܗܕܟ ܡܘܩܪܒܠܗܿ ܗܘܢܝ̈ܐ ܠܒܢܝ̈ ܥܡܢ ܒܦܘܪܣܐ ܕܥܐܕ̈ܐ ܕܐܟܝܬܘ ܘܪܫܐ ܕܫܢ̄ܬܐ ܐܘܡܬܢܝܬܐ، ܘܫܘܪܪܠܗܿ ܥܠ ܐܡܝܢܝܘܬܐ ܕܣܢܕܬܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܓܘ ܪܩܡܢܬܐ ܕܐܝܬܘ̈ܬܗ ܘܐܫܛܪ̈ܗ.
ܒܬܪ ܗܕܟ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ، ܚܕ ܡܡܠܐ ܫܘܪܪܠܗ ܓܘܗ : ( ܥܡܢ ܚܝܐܝܠܗ ܘܠܐ ܡܝܬ، ܘܘܠܐ ܥܠܢ ܕܟܠܚ ܕܪܩܘܒܠ ܐܝܟܢ̈ܘܬܐ ܘܠܐ ܟܝܦܚ ، ܘܐܚܢܝ ܒܢܝ̈ ܐܝ ܐܪܥܐܝܗ̄ܘܚ ܡܢ ܩܕ̄ܡ ܐܠܦܝ̈ܐ ܕܫܢ̈ܐ ܒܥܘܡܩܐ ܕܬܫܥܝܬܐ)، ܘܪܡܙܠܗ ܕ( ܐܝ ܥܡܐ ܫܒܘܩ ܡܢ ܪ̈ܕܘܦܝܐ ܕܒܚܙܝܐܝܠܗ ܐܠܐ ܒܩܝܡܐܝܠܗ ܡܢ̄ܕܪܫ ܡܣܒܒ ܝܠܗ ܚܕ ܥܡܐ ܡܚܒ ܠܚܝܘܬܐ ܘܚܝܝܬܐ ܒܫܠܡܐ ܥܡ ܐܡܘ̈ܬܐ ܫܒܒ̈ܐ ܐ̄ܚܪ̈ܢܐ.
ܘܡܘܩܪܒܠܗ “ܐܘܓܼܢܐ” ܒܚܘܬܡܐ ܕܡܡܠܗ ܩܘܒܠܛܝܒܘܬܗ ܘܐܝܩܪܗ ܠܓܪܐ ܕܟܕܝܪ̈ܐ ܘܫܕܬܢ̈ܐ ܕܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܛܟܣܬܐ ܕܐܝ ܥܕܥܐܕܐ، ܘܡܛܘܝܡܢܗ ܐܦ ܗܕܟ ܠܓܪܐ ܕܓܢ̄ܒܢ̈ܐ ܫܘܠܛܢܝ̈ܐ ܘܥܕܬܢܝ̈ܐ ܘܟܢܘܫܝܝ̈ܐ ܣܢܕܢ̈ܐ ܕܥܕܥܐܕܐ.
ܘܡܘܩܪܒܠܗ ܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ “ܒܪܢܐܪܕ ܝܘܣܦ” ܚܕ ܡܡܠܐ ܫܘܪܪܠܗ ܓܘܗ ܕܙܘܝܚ̈ܐ ܕܥܡܢ ܬܘܕܝܬܢܝ̈ܐ ܘܐܘܡܬܢܝ̈ܐ ܟܐ̄ܣܪܝ ܒܐܚܕܕܐ ܟܠ ܫܢ̄ܬܐ، ܐܟܝܬܘ ܪܡܙܐܝܠܗ ܕܚܘܕܬܐ ܘܪܒܝܥܐ ܐܬܐ ܥܡ ܩܝܡܬܐ ܕܡܪܢ ܝܫܘܥ ܡܫܝܚܐ ܡܢ ܒܝܬ ܡܝܬ̈ܐ ܗܘ ܕܪܡܙ ܠܚܝ̄ܐ ܚܕܬ̈ܐ.
ܘܦܝܫܠܗܘܢ ܡܦܘܠܓ̄ܝܐ ܒܝܘܡܐ ܐ̄ܚܪܝܐ ܡܢ ܥܕܥܐܕܐ ܕܘܪ̈ܥܐ ܕܡܝܩܪܢܘܬܐ ܠܣܢܕܢ̈ܐ ܘܪ̈ܥܝܐ ܪ̈ܘܫܡܝܐ ܕܥܕܥܐܕܐ، ܘܚܒܫܠܗܘܢ ܥܒܘܕܘ̈ܬܐ ܕܝܘܡܐ ܐ̄ܚܪܝܐ ܡܩܪܒܬܐ ܕܡܢܝܢܐ ܡܢ ܙܡܝܪ̈ܬܐ ܡܫܘܬܦܠܗܘܢ ܓܘܝܗܝ ܡܢܝܢܐ ܡܢ ܐܡܢ̈ܐ ܕܥܡܢ ( ܒܪܣܢ ܐܦܪܝܡ، ܙܘܗܝܪ ܨܠܝܒܐ، ܡܐܕܠܝܢ ܐܝܫܘܦܐ، ܦܝܠܝܒܿ ܘܠܝܡ)، ܒܫܘܬܦܬܐ ܪܒܬܐ ܡܢ ܟܢܫܐ ܡܛܝܒܐ ܒܪ̈ܩܕܐ ܦܠܟܠܘܪ̈ܝܐ.
ܘܦܝܫܠܗܘܢ ܡܛܝܒ̈ܐ ܠܙܘܝܚܐ ܚܘܬܡܝܐ ܕܥܕܥܐܕܐ ܩܝܡܐ ܒܦܘܠܚܢ̈ܐ ܕܩܢܨܠܐ ܐܡܪܝܟܝܐ ܓܘܢܝܐ ܓܘ ܐܪܒܝܠ ܡܝܩܪܬܐ ” ܒܐܡܝܠܐ ܗܐܟ” ܘܡܠܘܟܐ ܕܫܘܘܚܐ ( ܡܪܒܝܬܐ) ܓܘ ܘܟܝܠܘܬܐ ܐܡܪܝܟܝܬܐ ܕܫܘܘܚܐ ܬܒܠܝܐ USAID ܡܝܩܪܐ ” ܟܪܝܣܬܘܦܪ ܠܐܦܪܐܓ̰”.
ܘܦܝܫ ܕܟܝܪܐ، ܕܡܕܒܪܢܘܬܐ ܓܘܢܝܬܐ ܕܡܕܪܘܬܐ ܘܐܡܢ̈ܐ ܣܘܪ̈ܝܝܐ ܒܫܘܠܛܢܘܬܐ ܕܩܠܝܡܐ ܕܟܘܪܕܣܬܢ ܝܠܗܿ ܐܡܝܢܝܬܐ ܒܛܘܟܣܐ ܕܥܕܥܐܕܐ ܕܝܪܬܘܬܐ ܣܘܪܝܝܬܐ ܒܢܝܣܢ ܡܢ ܟܠ ܫܢ̄ܬܐ، ܦܝܫ ܥܒܝܕܐ ܓܘܗ ܥܒܘܕܘ̈ܬܐ ܝܪ̈ܬܘܬܢܝܐ ܘܥܡܡܝ̈ܐ ܡܫܚܠܦ̈ܐ، ܥܡ ܫܘܩܐ ܝܪܬܘܬܢܝܐ ܗܘ ܕܦܝܫ ܦܬܝܚܐ ܒܝܘܪܟܐ ܕܝܘܡ̈ܐ ܕܥܕܥܐܕܐ، ܘܦܝܫܠܗ ܥܒܝܕܐ ܢܘܣܟܐ ܪܒܝܥܝܐ ܡܢ ܥܕܥܐܕܐ ܗܕ ܫܢ̄ܬܐ ܒܡܬܚܐ ܡܢ ( 4-6) ܢܝܣܢ 2024.
