ܡܘܦܩܠܗܿ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܠܫܢ̄ܬܐ ܬܪܝܢܝܬܐ ܢܩܦܐܝܬ، ܚܕ ܟܬܒܼܐ ܚܕܬܐ ܣܘܓܼܠܢܗܿ ܓܘܗ ܫܘܡܠܝ̈ܗܿ ܘܟܫܝܪ̈ܘܬܗܿ ܕܒܫ ܐܢܢܩܝ̈ܐ ܘܦܪ̈ܝܫܐ ܐܢܝ ܕܟܡ ܛܟܣܐܠܗܘܢ ܡܬܚܐ ܕܫܢ̄ܬܐ ܕ(2023).
ܘܚܒܫܠܗܿ ܦܬܐ ܩܕܡܝܬܐ ܡܢ ܟܬܒܐ ܡܡܠܐ ܕܦܘܬܚܐ ܕܡܕܒܪܢܐ ܓܘܢܝܐ “ܟܠܕܘ ܪܡܙܝ ܐܘܓܼܢܐ”، ܬܢܐܠܗ ܓܘܗ ܠܡܐ ܕܚܒܫܠܗܿ ܫܢ̄ܬܐ ܥܒܝܪܬܐ ܡܢ ܫܘܡܠܝ̈ܐ ܕܟܡ ܫܪܪܐܠܗܘܢ ܡܕܒܪܢܘܬܐ ܓܘܢܝܬܐ، ܫܒܼܘܩ ܡܢ ܟܠܝܗܝ ܐܝܟܝܢܘ̈ܬܐ ܘܩܛܪ̈ܐ ܡܠܝ̈ܐ ܐܢܝ ܕܟܠܐܠܗܘܢ ܕܪܩܘܒܠ ܩܠܝܡܐ ܘܦܢܝܬܐ، ܐܠܐ ܒܣܢܕܬܐ ܡܢ ܒܢܝ̈ ܥܡܢ ܘܣܢܕܬܐ ܕܫܘܠܛܢܘܬܐ ܕܩܠܝܡܐ ܘܘܙܝܪܘܬ ܡܪܕܘܬܐ ܘܒܚܘܦܛܐ ܕܟܕܝܪ̈ܐ ܕܡܕܒܪܢܘܬܐ ܡܨܐܠܗܿ ܡܕܒܪܢܘܬܐ ܕܚܬܡܐ ܫܢ̄ܬܐ ܕ(2023) ܒܢܨܝܚܘܬܐ ܪܒܬܐ.
ܘܡܒܝܢ “ܐܘܓܼܢܐ” ܓܘ ܡܡܠܗ ܕܡܕܒܪܢܘܬܐ ܫܘܪܪܠܗܿ ܫܪܝܬܐ ܕܥܕܥܐܕܐ ܕܒܐܡܐ ܣܘܪܝܝܐ ܩܕܡܝܐ ܗܘ ܕܦܝܫܠܗ ܚܙܝܐ ܒܫܘܬܦܬܐ ܕܝܗܠ̈ܐ ܒܐܡܝ̈ܐ ܘܐܡܢܝ̈ܐ ܣܘܪ̈ܝܝܐ ܡܢ ܐܬܪܐ ܘܐܬܪ̈ܘܬܐ ܕܫܒܒ̈ܐ، ܘܗܘ ܕܝܗ̄ܘܐ ܚܕ ܢܘܩܙܐ ܦܘܪܫܢܝܐ ܘܦܪܝܫܐ ܒܡܐܙܠܬܐ ܕܡܕܒܪܢܘܬܐ ܒܡܬܚܐ ܕܫܢ̄ܬܐ ܥܒܝܪܬܐ.
ܘܡܚܘܬܬܠܗ “ܐܘܓܼܢܐ” ܕܡܕܒܪܢܘܬܐ ܫܘܪܐܠܗܿ ܡܫܩܠܐ ܬܪܝܢܐ ܡܢ ܬܪܡܝܬܐ ܕ( ܢܛܪܬܐ ܕܝܪܬܘܬܐ ܡܪܕܘܬܢܝܬܐ ܕܒܨܘܪ̈ܘܬܐ ܓܘ ܥܝܪܩ) ܘܗܝ ܝܠܗܿ ܚܕܐ ܬܡܡܬܐ ܪܒܬܐ ܠܒܝܬ ܥܬܩ̈ܐ ܕܝܪܬܘܬܐ ܣܘܪܝܝܬܐ، ܕܚܬܡ ܡܡܠܗ ܒܝܗ̄ܒܼܠܬܐ ܕܘܥܕܐ ܠܩܪ̈ܘܝܐ ܕܗܘܝܐ ܫܢ̄ܬܐ ܕ(2024) ܫܢ̄ܬܐ ܡܠܝܬܐ ܡܢ ܟܫܝܪܘܬܐ ܪܢܝܝܬܐ ܘܐܡܢܝܬܐ ܘܡܪܕܘܬܢܝܬܐ ܘܗܝ ܒܕ ܚܙܝܐ ܚܕܐ ܝܨܝܦܘܬܐ ܪܒܬܐ ܒܠܦܦܐ ܕܐܕܫܢܝܘܬܐ ܘܗܝ ܕܝܠܗܿ ܚܕܐ ܡܫܡܗܘܬܐ ܦܪܝܫܬܐ ܠܥܝܪܩ ܘܩܠܝܡܐ ܕܟܘܪܕܣܬܢ.
ܘܦܝܫ ܕܟܝܪܐ، ܟܬܒܐ ܝܠܗ ܡܢ ܛܘܝܒܼܐ ܕܡܢܬܐ ܕܝܘܕܥܐ ܒܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܘܚܒܼܫ (254) ܦܬܘ̈ܬܐ ܘܒܓܘܫܡܐ ܪܒܐ، ،ܒܠܫܢ̈ܐ ܣܘܪܝܝܐ ، ܩܘܪܕܝܐ، ܥܪܒܝܐ ܘܐܢܓܠܝܙܝܐ، ܥܡ ܨܘܪ̈ܬܐ ܡܓܘܢ̈ܐ ܚܕܪ ܟܫܝܪ̈ܘܬܐ ܐܢܝ ܕܦܪܫܠܗܿ ܓܘܝܗܝ ܡܕܒܪܢܘܬܐ ܓܘܢܝܬܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܡܬܚܐ ܕܫܢ̄ܬܐ ܥܒܝܪܬܐ.
ܘܡܨܝܬܘܢ ܕܚܙܝܬܘܢ ܠܗ ܠܦܘܬ ܐܣܪܐ ܕܐܬܐ :