ܣܘܩܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܒܩܠܝܡܐ ܕܟܘܪܕܣܬܢ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܘܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ “ܒܪܢܐܪܕ ܝܘܣܦ”، ܝܘܡ ܚܡܫܒܫܒܐ 11 ܢܝܣܢ 2024 ، ܓܘ ܐܘܢܐ ܕܒܝܬ ܥܬܝܩ̈ܬܐ ܕܝܪܘܬܐ ܣܘܪܝܝܬܐ ܒܪܘܣܬܩܐ ܕܥܢܟܒܐ ܒܗܘܦܪܟܝܐ ܕܐܪܒܝܠ، ܡܫܕܪܘܬܐ ܡܢ ܡܛܟܣܬܐ ܕܓܫܪܘ ܗܝ ܕܚܒܫܐ ܓܠܘܝܘܬܐ ܥܠܝܡܘܬܝܬܐ ܡܢ ܒܢܝ̈ ܥܡܢ ܕܐܝܬ ܒܐܬܪ̈ܘܬܐ ܕܬܒܝܠ (ܐܘܚܕܢ̈ܐ ܡܚܝܕ̈ܐ ، ܟܢܕܐ ، ܐܘܪܘܦܐ ، ܐܘܣܬܪܠܝܐ ܘܐܘܚܕܢܘܬܐ ܡܚܝܕܬܐ).
ܘܟܪܟܠܗܿ ܡܫܕܪܘܬܐ ܣܥܘܪܬܐ ܒܡܢܘ̈ܬܐ ܕܒܝܬ ܥܬܝܩ̈ܬܐ ܘܚܙܐܠܗܿ ܩܢܝ̈ܬܗ ܘܐܝܬܘ̈ܬܗ ܐܢܝ ܕܡܛܦܣܢܝ ܚܕ ܝܘܪܬܢܐ ܡܕܝܢܝܐ، ܝܪܬܘܬܢܝܐ ܘܥܡܡܝܐ ܕܥܡܢ ܡܢ ܦܢܝ̈ܬܐ ܡܫܚܠܦ̈ܐ ܕܐܝܬܘܬܗ ܒܐܬܪܐ، ܘܩܘܠܣܠܗܿ ܥܠ ܦܘܠܚܢܐ ܗܘ ܕܩܝܡܐ ܓܘܗ ܡܕܒܪܢܘܬܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܢܩܝܦܬܐ ܠܡܕܒܪܢܘܬܐ ܓܘܢܝܬܐ ܒܢܛܪܬܐ ܕܝܪܬܘܬܐ ܕܥܡܢ ܫܪܫܝܐ ܒܐܬܪܐ.
ܘܩܒܠܗ ܒܫܝܢܐ ܡܕܒܪܢܐ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܡܝܩܪܐ “ܒܪܢܐܪܕ ܝܘܣܦ” ܒܡܡܠܗ ܒܡܫܕܪܘܬܐ ܣܥܘܪܬܐ، ܘܡܘܩܪܒܠܗ ܚܕ ܦܘܫܩܐ ܐܪܝܟܐ ܚܕܪ ܦܘܠܚܢ̈ܐ ܘܟܫܝܪ̈ܘܬܐ ܐܢܝ ܕܩܝܡ ܓܘܝܗܝ ܒܝܬ ܥܬܝܩ̈ܬܐ ܠܢܛܪܬܐ ܕܝܪܬܘܬܐ ܕܐܒܗ̈ܬܐ، ܘܒܥܐܠܗ ܒܚܘܬܡܐ ܕܡܡܠܗ ܠܡܛܟܣܬܐ ܘܗܕܡ̈ܗܿ ܡܢܬܝܬܐ ܘܢܨܝܚܘܬܐ ܒܦܘܠܚܢܝ̈ܗܝ ܨܒܝܢܝܐ.
ܒܬܪ ܗܕܟ ܡܘܩܪܒܠܗ ܡܕܒܪܢܐ ܓܘܢܝܐ ܕܡܪܕܘܬܐ ܘܐܡܢ̈ܐ ܣܘܪ̈ܝܝܐ ܡܝܩܪܐ “ܟܠܕܘ ܪܡܙܝ ܐܘܓܼܢܐ” ܚܕ ܡܡܠܐ ܫܘܪܪܠܗ ܓܘܗ ܕܒܝܬ ܥܬܝܩ̈ܬܐ ܕܝܪܬܘܬܐ ܣܘܪܝܝܬܐ ܦܝܫܠܗ ܚܕ ܢܘܪܐ ܕܓܠܐ ܠܫܪܫܝܘܬܐ ܕܥܡܢ ܒܥܘܡܩܐ ܕܬܫܥܝܬܐ ܢܗܪܝܢܝܬܐ، ܘܪܡܙܠܗ ܕܒܝܬ ܥܬܝܩ̈ܬܐ ܐܡܝܢܝܐܝܠܗ ܒܣܓܼܠܢܬܐ ܘܪܩܡܢܬܐ ܕܐܝܬܘ̈ܬܗ ܘܩܢܝ̈ܬܗ ܥܬܩܝ̈ܐ ܕܦܝܫܝ ܒܐܝܕܐ ܕܒܨܘܝ̈ܐ ܒܕܥܬܝܕ.
ܘܛܘܝܡܢܗ “ܐܘܓܼܢܐ” ܒܚܘܬܡܐ ܕܡܡܠܗ ܒܓܪܐ ܕܡܛܟܣܬܐ ܕܓܫܪܘ ܒܣܢܕܬܐ ܕܐܝܬܘܬܐ ܕܥܡܢ ܥܠ ܐܪܥܐ ܕܐܒܗ̈ܬܗ، ܘܓܪܝܗܝ ܒܟܦܫܬܐ ܕܩܘܪܒܐ ܕ(70) ܥܠܝܡ̈ܐ ܘܥܠܝܡ̈ܬܐ ܡܢ ܦܢܝ̈ܬܐ ܡܫܚܠܦ̈ܐ ܒܬܒܝܠ ܕܦܝܫܝ ܐܡܝܢܝ̈ܐ ܥܡ ܚܙܡܢܝ̈ܗܝ ܒܓܘܝ̈ܐ ܕܐܬܪܐ.
ܘܡܘܥܒܪܗܿ ܪܫܬܐ ܕܡܫܕܪܘܬܐ ܐܬܝܢܬܐ ܡܢ ܐܘܚܕܢ̈ܐ ܡܚܝܕ̈ܐ ܕܐܡܪܝܟܐ ܡܝܩܪܬܐ”ܥܘܕܪܢܐ ܐܝܫܘܥ” ܥܠ ܦܨܚܘܬܗܿ ܪܒܬܐ ܠܐܝܩܪܐ ܕܣܩܒܠܬܐ، ܘܚܝܪܬܗܿ ܡܣܝܡܢܬܐ ܥܡ ܡܫܕܪܘܬܐ ܣܥܘܪܬܐ ܚܕܪ ܫܘܦܪܐ ܕܐܬܪܐ ܒܬܪ ܫܘܬܦܬܝܗܝ ܒܥܕܥܐܕ̈ܐ ܘܙܘܝܚ̈ܐ ܥܒܝܕ̈ܐ ܒܦܘܪܣܐ ܕܥܐܕ̈ܐ ܕܐܟܝܬܘ.
ܘܒܚܘܬܡܐ ܕܣܥܘܪܘܬܐ ، ܡܘܩܪܒܠܗ ܡܕܒܪܢܐ ܓܘܢܝܐ ܢܘܣܟܐ ܡܢ ܕܘܒܩܐ ܕܟܫܝܪ̈ܘܬܐ ܕܡܕܒܪܢܘܬܐ ܕܫܢ̄ܬܐ ܕ(2023) ܠܡܫܕܪܘܬܐ ܕܡܛܟܣܬܐ ܕܓܫܪܘ، ܘܦܝܫܠܗ ܬܢܝܐ ܚܕܪ ܟܫܝܪ̈ܘܬܐ ܘܥܒܘܕܘ̈ܬܐ ܡܪ̈ܕܘܬܢܝܐ ܘܟܢܘܫܝܝ̈ܐ ܐܢܝ ܕܟܡ ܛܟܣܐܠܗܘܢ ܡܕܒܪܢܘܬܐ ܓܘܢܝܬܐ ܒܡܬܚܐ ܥܒܝܪܐ، ܘܫܘܪܪܠܗ “ܐܘܓܼܢܐ” ܕܬܪ̈ܥܐ ܕܡܕܒܪܢܘܬܐ ܦܬܝܚ̈ܐܝܠܗܘܢ ܠܥܘܕܪܢܐ ܥܡ ܟܠܝܗܝ ܫܘܬܐܣ̈ܐ ܣܘܪ̈ܝܝܐ ܕܐܝܬܠܗܘܢ ܐܣܘܪܐ ܒܥܡܢ.
